Mag-fake news masilutan na

USA ka ordinansa ang daling giduso ug gipasar gilayon atol sa regular session sa Hunta Probinsyal sa Lunes, Pebrero 10, 2020.

Kini may labot sa pagsilot sa mga tawo nga magpakatap og sayop nga impormasyon pinaagi sa social media sites sama sa Facebook, Instagram ug Twitter.

Kabahin kini sa padayong giobserbahan nga 2019-new coronavirus acute respiratory disease (2019-nCoV ARD).

Ang ordinansa subay sa Executive Order (EO) ug memorandum nga giluwatan ni Gobernador Gwendolyn Garcia kabahin sa nahisgutang sakit.

Gipangamahanan ni Bokal Kerrie Keane Shimura sa kwatro distrito, kinsa pangu sa committee on health sa Hunta Probinsyal.

Ang ordinansa giulohan og “An ordinance adopting the provisions of Executive Order No. 5-A issued by Governor Gwendolyn Garcia and prohibiting the spread of False news and information in the Social Media in relation to 2019-new coronavirus acute respiratory disease (2019- nCoV ARD) providing penalties for violation thereof and approriating funds for this purpose.”

Tumong niini aron malikayan ang sayop nga mga impormasyon o “fake news”, kalabot sa maong sakit nga maghatag og kalibog ingon man karatol sa mga Sugbuanon.

Silotan ang molapas sa maong ordinansa.

Ubos sa ordinansa, may multa nga P5, 000 ang mobuhat niini o ba mosangpot sa pagkapriso nga di molapas sa usa ka tuig.

Gawas sa pag-post sa social media sites, gilaraw usab ni Shimura nga lakip na sa mga masilotan ang mga magpadala og mensahe pinaagi sa text kalabot sa sayop nga mga impormasyon sama sa mga “chain messages”.

“Kanang sa social media spreading sa fake news kay maka create na siya ug panic so atong gibutangan og penalties pag butang sad ug ngipon sa atong ordinansa”, matod ni Shimura.

Alang sa mga mosumbong, kinahanglan nga i-dangop kini sa Provincial Legal Office (PLO) alang sa pagpahimutang sa mga ebidensya ug dokumento alang sa mga proseso nga again niini.

Si Atty.Russel Soliano Pernites, consultant ni Shimura, nagkanayon nga tanan mahimong makasumbong.

“Since this is a provincial ordinance and a violation of the ordinance, ipaagi nato ang atoang complaints sa provincial legal so in that way ang provincial legal mao na ang mo facilitate sa filing of complaint either sa City prosecutor or provincial prosecutor”, matod ni Pernites.

Lakip usab sa mapahamtangan sa silot mao ang mga pasahero nga di motug-an sa tinuod sa pag fill up sa health declaration cards nga usa sa proseso nga agian niini sulod sa paluparan ug pantalan.

Gituyo kini tungod kay ang cards mahimong sumbanan unya sa mga doktor atol sa himuon nga pakisusi sa mga pasahero.

Ikiha

Mopasaka og kaso karong Martes, Pebrero 11, 2020 ang Talisay City Legal Office batok kag Jewel Louie Aviso, ang lalake nga ni-post sa social media kalabot sa giingong dunay pasyente sa Talisay City District Hospital nga dunay 2019-novel coronavirus acute respiratory disease (ARD).

Sigon ni Talisay City Attorney Giovanni Sususco, sugo ni Talisay City Mayor Gerald Anthony “Samsam” Gullas Jr. ang pagkiha.

Saysay ni Sususco nga sa miaging semana pa lang sila nagsugod pag-establisar sa mga posibleng kaso nga ilang isang-at.

Ila na usab napamatud-an nga kang Aviso gikan ang maong mga post sanglit ang nauwahi nangayo man og “public apology.”

Ila nang giusa tanan mga ebidensya pangamdam sa ilang ipasaka nga kaso.

Ang mga kaso nga isang-at mao ang kalapasan sa Article 554 sa Revised Penal Code nga may kalabutan sa Cyber Crime Law kun Republic Act (RA) 10175 ug usurpation of official function diin si Aviso nangangkon nga siya sakop sa Talisay Rescue Team bisan kon di siya miyembro.

“Naa may penalty nga imprisonment ang Article 154. Aside sad ana, in relation sa Cyber Crime Law, mo-file sad mi og usurpation of authority kay ni-claim man sya nga member sa Disaster Rescue Team which is he is not a member,” sigon ni Sususco.

Si Justice Secretary Menardo Guevarra niawhag nga imbestigahon ug makig-koordinar sa National Bureau of Investigation mahitungod sa maong pagpasaka og kaso batok sa nipakatap og fake news. (ANV, JCT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph