SA NIAGING semana, mitumaw ang balita nga ang winningest basketball coach sa local circuit sa Sugbo nga si Raul “Yayoy” Alcoseba mao nay modala pagbalik sa University of San Jose Recoletos (USJ-R) Jaguars alang sa umaabot nga Cebu Schools Athletic Foundation, Inc. (Cesafi).
Kini human matapos ang iyang tulo ka tuig nga pagdumala sa University of Cebu (UC) diin iyang impresibong nadala ang Webmasters ngadto sa duha ka semifinals round ug usa ka finals.
Matod pa nga niadtong Enero 31, 2020, si Alcoseba nakig-istorya na sa mga sports officials sa maong unibersidad nga sila si Rev. Fr. Roy Baluarte, OAR, kinsa maoy vice president for student welfare ug sports moderator, ug ingon man ni Atty. Jesus “Boyet” Velez, director of the Student Affairs Office ug mao usab ang assistant sports moderator.
Apan si Atty. Velez, sa akong pagpakighinabi niadtong Sabado sa gabii, miklaro nga wala pay desisyon ang eskuwelahan kalabot niini.
Iyang gikompirmar nga nangaplay si Alcoseba sa maong posisyon ug gani ila na kining gika-istorya.
Sa samang higayon gipadayag ni Velez nga wala pay desisyon nga nakab-ot kalabot niini.
“Yes, we talked to Yayoy (Alcoseba) already. Ako ug si Fr. Baluarte. Atong gipaminaw ang iyang side, but nothing is final yet. Dili man mi maka-decide. It is the board of the school ang mo-desisyon,” matod ni Velez.
“Wa pa man mag-meeting ang board. Ang amo is to report sa board og unsay among naestoriyahan. Tan-awon ug estudyohan pa man na kon mo-fit ba sa atong direction ang iyang sistema,” dugang niya.
Gibutyag usab ni Velez nga ang kasamtangang coach nga si Leodie Garcia mao gihapon ang nagdumala sa team sanglit anaa pa man kini kontrata.
“Leodie is still the coach kay naa pa may kontrata. We don’t even know kon i-renew ba siya o dili. It’s up to the board, gyud.
Iyang giingon nga dili lang kay si Alcoseba ang mipadangat sa ilang aplikasyon.
Ila usab nga gikonsiderar ang pag-apply nila ni coach Norberto “Titing” Manalili ug coach Pablo Yu kinsa pulos usab mga kanhi coach sa Jaguars.
•••
Taliwala niining pagkatap sa makalilisang nga corona virus ngadto sa nagkalainlaing nasod, ang mga organizers sa Tokyo 2020 Olympics porsigido nga ipadayaon gyud kining dakong kalihukan.
Si Toshiro Muto, ang chief executive officer sa organizing committee, mipadayag nga way kausaban sa ilang preparasyon ug unom ka buwan gikan karon andam na silang mo-host niini. Kini sugdan sa Hulyo 25.
Ilang gikasagmuyo ug gipanghimakak ang balita nga gikanselar ang 2020 Olympics tungod kuno sa coronavirus.
Ilang gipasalig nga hugot ang ilang pagpakig-ayuda sa International Olympic Committee (IOC) ug sa World Health Organizaiton (WHO) ug andam usab sila mohimo og mga precautionary measures alang sa kasiguroan sa mga atleta, opisyals, mga guests, tourists nga linawas mosaksi sa events.
Pero para nako depende ra gyud ni sa sitwasyon. Kinsa may morisgo kon di makontgrolar ning maong virus. (jun.migallen22@gmail.com)