DILI ikalimod nga ang hulga sa 2019 novel coronavirus acute respiratory disease (2019-nCoV ARD) nakaapekto sa competition calendar sa nag-unang mga atleta sa nasod lakip na ang mga sumosulbong gikan sa Sugbo.
Ang kasamtangang Southeast Asian (SEA) Games triathlon silver medalist Andrew Kim Remolino kauban sila si junior triathletes CJ Lipura, Moira Frances Erediano, Alfred Pacabis, Justine Hermosa, Renz Wynn Corbin ug Nicole Marie del Rosario gikatakda untang molarga sa Thailand karong Pebrero 18 alang sa 2020 Triathlon Asian Championships.
Apan gumikan sa hulga sa 2019-nCoV ARD, nahadlok ang ginikanan sa nahisgutang mga atleta hinungdan nga nakanselar ang biyahe.
“We backed out of the race as a precautionary measure on the 2019-nCoV. The parents want safety of their children,” asoy ni Go For Gold coach Roland Remolino sa interbyu sa SunStar Cebu, igsuong buhatan ning mantalaan.
Hinuon gipasabot ni Remolino nga bisa’g dili sila modayon pagsalmot sa Thailand event, padayon ang ilang hugot nga pagbansaybansay dinhi sa Sugbo.
Ang 2019-nCoV ARD ningkatap na sa kapin sa 25 ka mga nasod diin kadaghanan sa mga nataptan ning maong sakit nagagikan sa mainland China. Sa Thailand, adunay 32 ka kompirmadong kaso ang gikataho.
Dili lang sa Sugbo, hasta ang nag-unang mga atleta sa nasod ang naapektuhan sab sa 2019-nCoV ARD sama na lang ni Olympian weightlifter nga si Hidilyn Diaz, kinsa dili na modayon sa iya untang usa ka buwan nga training sa China.
Ang Philippine Sports Commission (PSC) mipauswag na sa ilang events ug seminars sama sa Philippine National Games, Children’s Games, National Sports Summit, ug uban pa.
Sa Rehiyon 7, gipa-uswag na sab ang pagpahigayon sa Central Visayas Regional Athletic Association Meet ug Private Schools Athletic Association. (RSC, ESL)