PAG-abli nako sa akong laptop kaganihang buntag, nisugat kanako ang statistics nga miabot na og 40,171 ang mga infected ug 908 ang nangamatay tungod sa 2019 novel coronavirus o NCoV.
Alang kanako, swerte ang Pilipinas nga sa pagkakaron, tulo lang ka mga Chinese nationals gikan sa Wuhan, China nga kumpirmadong natakboyan sa maong kagaw. Usa kanila ang namatay.
Ang Pilipino nga natakboyan sa kagaw kay tua sa gawas. Ang usa sakay og usa ka cruise ship nga tua karon sa Japan samtang tuay lain sa Dubai.
Apan di kita angayang mokumpyansa. Wala pa makontak ang tanang nahimamat sa tulo ka mga Insek nga natakboyan sa maong kagaw.
Ubos sa protocols sa ingon niini nga outbreak, angayang gisubay na ang tanang kuyog nila sa abyon gikan sa Hong Kong nga nitugpa sa Mactan-Cebu International Airport (MCIA).
Gikan sa airport, unsay ilang gisakyan padulong sa ilang mga destinasyon dinhi sa Pilipinas. Ang nakapabalaka nako kay dinhi sila sa Sugbo, Dumaguete ug Bohol nagsuroysuroy.
Atong nabasahan nga nanawagan na karon ang mga awtoridad sa mga pasahero sa fast craft gikan sa Sugbo padulong sa Syudad sa Tagbilaran.
Ang ako lang, magduhaduha ka og angkon nga sakay unya ibutang ka og quarantine og 14 ka adlaw.
Bisan pa man, importante kining quarantine aron masiguro kita nga natakdan o wala ba ang usa ka tawo nga nakahimamat adtong mga positibo sa virus. Kini aron masiguro kita nga dili ka makatakod kon pananglit positibo ka.
Usbon lang nako nga swerte ang Pilipinas sa pagkakaron. Gikuyawan lang ko nga basin og dunay mga napositibo dinhi sa Pilipinas tungod sa tulo ka mga turistang Insek.
Sa pagkakaron, importante lang nga maniguro sab kita sa atong personal hygiene aron dili kita matakdan. Makatabang apan dili gyud kinahanglan ang magmaskara.
Mao nga maglibog ko nganong gimando sa Land Transportation Franchising Regulatory Board (LTFRB) nga kinahanglang dunay mga maskara ang mga public utility drivers unya pabayron og P5,000 ang madakpang wala niini.
Wa mag-coordinate ang LTFRB ug ang Department of Health (DOH)? Dayon ang atong mga drayber maoy alaot?
Kon tarong kining mga tinugyanan sa LTFRB, di nila ipakanaog kining ilang lagda kabahin sa mga maskara. Mohulat sila og klarong advisory gikan sa DOH.
Sa laing bahin, kinahanglang ang DOH mohimo og labing menos, inadlaw nga update kabahin sa NCoV. Kini aron matubag ang panginahanglan sa katawhan nga mga impormasyon ug dili fake news.
Sa pagkakaron, daghan na kaayong nagkatag nga inamaw nga fake news. Motuo ra ba dayon ang atong mga intelehente kuno nga mga netizens. (@anol_cebu sa Twitter)