LAPOK. Niadtong Huwebes sa miaging semana nga kusog kaayo ang uwan nga ang tolo ka dakbayan, Lapu-Lapu, Mandaue ug Cebu, gibahaan naatol nga naa koy hearing sa municipal trial court sa Lapu-Lapu. Sa pagsulod na ko sa dalan padung sa korte nga maoy say dalan padung sa city hall ang misugat sa akong panan-aw mao ang nga gibahaan nga dalan.
Gani, ang akong giparkingan naumol sa tubig. Maayo na lang gani kay nagsul-ob na ko daan og botas tungod kay gibahaan man sad ang among dapit niadtong adlawa. Ako ray abogado nga nisulod sa korte nga nagbotas apan ang kadaghanan wa makamatikod.
Samtang naghuwat ko nga mogawas ang huwes, akong giteksan si Mayor Ahong Chan: “ayong buntag mayor! Wa pa gihapon ka hatagi budget sa konseho? Lapuk ug baha ning imong dalan padung citihol.” Ang tubag ni Mayor Chang: “this year atty mapatrabaho nato ang drainage sa city hall. Ty.”
Hinuon, nasunod ra ni Mayor Chan sa miagi nga administrasyon kanang problema sa drainage sa dalan nga pasulod sa city hall nga anaa usab ang uban nga mga opisina sa gobyerno sama sa korte, pulis ug sa Land Transportation office (LTO).
Ang problema ni Mayor Chan bisan tuod si Bise Mayor Celsi Sitoy iyang kauban sa partido, apan ang mayoriya sa konseho mga kauban pa ni kanhi Mayor Paz Radaza, nga karon kongresista na.
Maayo unta og maayo na ni nga dalan ug mabuhatan og kanal aron monindot ug makahatag garbo sa dakbayan sa Lapu-Lapu.
•••
PUTLON? Ipaputol ni President Duterte ang VFA (Visiting forces agreement) sa Amerika tungod sa iyang kasuko nga gi-inbalido ang US visa ni Sen. Bato dela Rosa, ang kanhi iyang PNP chief nga maoy mipatoman sa tokhang (toktok-hangyo) sa mga nalambigit o nagpatigayon sa ilegal nga drogas apan nagresulta sa daghan patay kay misukol sa kapulisan.
Gisugo ni Presidente Duterte si Executive Sec. Salvador Medialdia nga pasultian si Foreign Sec. Teddy Locsin nga ipadala na ang notisya ngadto sa Amerika nga putlon na ang VFA bisan pa sa naglahi nga panglantaw sa iyang sekretaryo sa national defense ug sa foreign affairs.
Niadtong Biyernes migawas na ang storya nga miorden na si Presidente Duterte nga putlon na ang VFA apan si Defense Sec. Delfin Lorenza miingon nga wa pa makadawat si Locsin sa mando ug iyang gitawag nga “fake news” ang maong taho.
Kaniadto dunay survey kon gusto ba ta sa Tsina o Amerika ug ang mayoriya adto gihapon sa Amerika mopabor. Ang pagputol sa VFA duna pay lain nga epekto sa atong nasudnong kasiguroan.
Atong ihatag ang desisyon sa atong mga lider ug manghinaut ta nga ilang palabihon kon unsay maayo alang sa nasud.