LIMA ka dagkong mga gaway sa usa ka drug syndicate nag-abot sa ilang hideout. Pulos sila armado og mga armas de fuego nga dekalidad sa bag-ong panahon. Si Hercules nga maoy lider sa lima naglingkod sa silya sa tumoy sa lamesa, naggunit og baso sa bino nga bag-uhay lang niyang giyarok. Si Ulysses naglingkod dapit sa tuo sa lamesa samtang sa iyang atbang dapit sa
wala didto pod si Apollo naggunit og AK-47. Si Samson ug si Moises nagtindog sa luyo ni Hercules. May pistola silang kalibre .45 nga gisuksok sa ilang hawakan. Pulos sila nag-dyaket og itom.
“Kinahanglan luwason nato si Zeus, ang atong drug lord!” matod ni Hercules. “Dad-on na siya sa Bilibid ugma kay nahukman na siya nga mabilanggo tibuok kinabuhi!”
“Unsaon nato pagluwas niya, Boss?” ni Ulysses.
Giyagyag ni Hercules ang plano. Mangumander silag duha ka police car. Siya ug si Ulysses maoy mosakay sa usa; si Apollo nga magpili og duha ka kauban sa ilang pundok maoy mosakay sa ikaduha. Si Samson ug si Moises magtagsa og sakay sa ilang kaugalingong awto. Sa nahibaw-an ni Hercules gikan sa tip sa ilang informer nga naa magtrabaho sa Cebu City Jail, si Zeus dad-on sa MCIA sa dakbayan sa Lapu-Lapu ug isakay sa helicopter padung sa Manila. Ang police car nga sakyan ni Zeus anha moagi sa unang taytayan nga nagdugtong sa Mandaue ug sa isla sa Mactan. Ang estratehiya: si Samson ug si Moises sakay sa ilang tagsa-tagsa ka awto adto maggikan sa tugkaran sa taytayan habig sa Lapu-Lapu. Sugaton nila sa taliwala sa taytayan ang police car nga sakyan ni Zeus ug pahunungon. Sa ilang bahin, si Hercules ug si Ulysses sakay sa gi-komander nilang police car magsunod kunohay sa police car nga gisakyan ni Zeus isip convoy. Magsunod nila ang police car nga sakyan ni Apollo ug duha niya ka kauban. Inig-abot nila sa tunga-tunga sa unang Mandaue-Mactan Bridge, ilang liyungan ang police car nga sakyan ni Zeus ug sa tulo ka police escort ug luwason si Zeus. Gibunyagan nila ang maong operasyon og ‘OPN: SAVE THE DRUG LORD.’
Pagka sunod adlaw natuman ang plano sa sindikato. Apan misukol ang tulo ka pulis nga nag-eskort kang Zeus. Nahitabo ang pinusilay sa tunga-tunga sa unang Mandaue-Mactan Bridge. Una sila nakabsan sa sa ilang kinabuhi, nakapangayo pa ang mga police escort og panabang sa kapulisan sa Mandaue ug Lapu-Lapu. Nangabot ang mga alagad sa balaod ug napatay sila si Apollo, Samson ug Moises. Naangol sila si Hercules ug si Ulysses. Giablihan ni P/Capt. Amerigo Lariosa ang pultahan sa police car nga gisakyan ni Zeus. Nakita nilang Hercules ug Ulysses ang napatay nilang tulo ka pulis. Apan naniga ang ilang mga mata kay wala nila makita si Zeus. Maoy ilang nakita ang usa ka manikin nga lalake nga naglingkod nga gitaliwad-an sa duha ka patay nga police escort. Patay pod ang drayber. Ang manikin gisul-oban og yellow T-shirt nga minarkahag ‘POLICE DETAINEE’.
Mitunog ang selpon ni P/Capt. Lariosa.
“Hello? This is Capt. Lariosa!”
“Capt. Lariosa, nahibawo na mi sa nahitabo diha. Si Capt. Abel de Leon ni. Nagsakay na mi sa helicopter padung sa Manila. Dili police car among gisakyan gikan sa Cebu City, private car lang. Ug didto mi moagi sa Marcelo Fernan Bridge, ang ikaduhang taytayan, Bye!”
“Bye!” ni Capt. Lariosa nga nagpahiyom ngadto nilang Hercules ug Ulysses nga nagtinutokay sa usag usa ug kansang mga nawong wa pa biyai sa katingala. (Katapusan)