TOLOSA, Leyte - Kagawad sa usa ka barangay ning lungsod nasikop sa anti-Illagal drugs operation, alas 10 sa buntag, Sabado, Pebrero 8, 2020.
Ang drug buy-bust operation gipahigayon sa Barangay Quilao ning lungsod. Giila ang suspek nga si Priam Salvo Ibañez, 41, minyo, kagawad sa maong barangay. Si Ibañez nalista sa kapulisan nga usa ka high value drug personality sa lungsod.
Matod sa kapulisan, nabutang sa watchlist ang kagawad gumikan sa daghang nadawat nila nga report nga nalambigit ang opisyal sa ilegal nga drugas.
Gipaubos kini nila sa surveillance ug nagpositibo ang ilang tuyo. Gilusad sa kapulisan ang joint operation pinangulohan ni Police Lieutenant Edgar Florendo sa Provincial Drug Enforcement Unit; Police Major Ruel Baganes sa Provincial Intelligence Branch; Police Captain Bernardo Arcena sa Tolosa PNP ug IA1 Cleveland Villamor sa Philippine Drug Enforcement Agency.
Napalitan og usa ka pakete sa gituohang shabu ang suspek ug dali nga gipalibutan sa mga operatiba. Sa pagrekisa, nakuhaan pa og laing tulo ka pakete sa gituhoang shabu ang suspek ug P500 nga marked money. (JKDP)