SA KABALAKA tungod sa nagpadayong hulga sa makamatay nga novel coronavirus, mga tagdumala sa labing dako nga paugnat sa kusog nga gihimo dinhi sa Davao nakadesidar nga isibog sa laing petsa ang ikatulong Alveo Ironman 70.3 Davao.

Sa Facebook advisory gikan sa Alveo Ironman 70.3 Davao, giingong ang desisyon nagtamod sab sa kasamtangang sitwasyon karon tungod sa outbreak.

"As has been well publicized, the World Health Organization has declared a public health emergency of international concern as it related to the coronavirus (2019-nCoV) outbreak. With athlete safety being a primary concern and in alignment with the recent Department of Health (DOH) advisory and Davao City Mayor Sara Z. Duterte, Ironman officials have decided to postpone the Ironman 70.3 Davao triathlon," tipik sa mensahe nila sa Facebook.

Suma pa nadesisyon nga isibog ang aktibidad sa Mayo 10, 2020.

Mga atletang apil sa kompetisyon ug nakarehistro na, suma pa pahibaw-on sa kausaban pinaagi sa email.

Mga organizers aminado sa dakong epekto niini ngadto sa mga atleta apan mihangyo sila og pagsabot sa kasamtangang sitwasyon.

Ang Alveo Ironman 70.3 Davao usa unta sa mga dagkong kalihukan subay sa 83rd Araw ng Davao.

Lunes, sa press conference ni Mayor Sara Duterte-Carpio, gipahibalo sab niini ang pagkanselar sa ubang dagkong aktibidad sa Araw ng Davao. Kini ang Pasiugdang Pagsaulog, Reyna Dabawenya, Ginoong Davao, Sayaw Pinoy, Kalingawan sa Sta. Ana, Hudyaka, Mutya ng Dabaw, Pasidungog, Araw ng Empleyado, Kanta Bidabawenyo, Parada Dabawenyo ug Datu Bago Awards.

Apan ang Misa Pasalamat ipadayon sa Marso 1.

Oktubre sa nakalabay nga tuig gisugdan ang rehistrasyon sa third Alveo Ironman 70.3 Davao diin mga partisipante di lamang gikan sa Davao, lakip na kasikbit dapit ug gawas nasud midugok sa Seda Hotel sa Davao City.