NAGKADUOL na ang Valentine's Day.
Hinay-hinay ng nagbaha ang mga post sa social media labot bulak, chocolates, teddy bears ug uban pa, nga suma pa, perfect as Valentine's Day gift.
Sa pagpanubay sa Superbalita Davao, nakatsikahan nato ang usa ka indibidwal nga sa wa damha nahilig sa paggama og bouquet.
"Nagsugod lang gyud nga mahatagan akong mama, lola sa akong uyab og personalized na bouquet para ma experience sad nila na hatagan og bongga ug gwapa nga bulak sa espesyal nga okasyon," ni Diane Jimenez.
Niya, mas nagkainteres sab siyang suwayan ug tun-an ang maong paghimo sa maong obra tungod sab sa sige'g panghatag og bulak ang iyang uyab kaniya.
"Isa sad sa nakatabang nako akong uyab na sigeg hatag og mahalon na bouquet kay diha ko nag sugod nagkainteres. Nagkaidea ko sa way of wrapping ug pag arrange sa bulak. Self study lang sad nako ni pinaagi sa pag tan-aw sa mga arrangements sa internet."
Sa hinay-hinay, nakat-on si Diane hangtud sa gisuwayan na niya ang pagdawat og orders gikan sa mga higala.
Kapartner ang iyang uyab namugna nila ang MD Flowers Davao nga gikan sa initials sa ilang ngalan.
"Combination of my nickname and my boyfriend's pero its Memorable Day among ginagamit kay Memorable Day gyud baya pag tagaan kag bulak. Usually surprise gyud na," tsika niya.
Sa kasamtangan, di pa kaayo halapad ang ilang market, sa mga flower shops ug ubang gagmay'ng suppliers una nila sila nagakuha sa ilang mga bulak.
Aminadong trabahoso ang maong negusyo, apan alang ni Jimenez, di kabayran ang kalipay nga ilang mabati panahon nga makita ang kalipay sa ilang mga kliyente nga midawat sa ilang hinimong bouquet.
Alang ni Jimenez, sa sama nilang nagsugod pa lang sa negusyo, ginapaningkamutan nilang mahatag ang "memorable experience" ngadto sa modawat og bulak.
Niya, wa kaayo sila mipatuman sa dakong presyo aron sab maka-avail ang uban nga limitado lang ang badget, apan buot makahatag og maanindot nga regalo sa ilang minahal.
"Pangmasa lang gyud ni among presyo ug flexible sad mi depende sa demand/budget sa among clients. As much as we want to make bonggang flowers pero gusto namo I-cater ang mga di gyud ka afford og bulak like pasiguan namo ang ilang budget kay ang importante maka hatag mi og kalipay sa among customers. Though mo cater gihapon mo og mahalon. pero dili namo gina disregard ang mga gamay ang budget."
Karong Valentine's Day, in-demand suma pa ang Roses ug Sunflowers kanila.
Plano ni Jimenez ug partner niini nga sa di madugay suwayan ang paggama og mga bulak alang sa kasal ug minatay.