NIADTONG miaging gabii, samtang nanihapon ako sa akong suki nga kan-an, nadungog nako ang tag-iya nga wa siya ganahi sa mga balita nga gipagawas sa ABS-CBN tungod kay pulos lamang pabor kanila.
Gitumbok niya ang mga balita sa TV network labot sa pagpasaka sa Office of the Solicitor General (OSG) og quo warranto nga kaso sa Supreme Court batok sa maong kompanya.
Sa akong pagpamahaw kagahapon sa lain nakong suki nga kan-anan, mao sab gihapon ang gihisgutan. Sa dagan sa istorya, nalipay sila tungod kay posibleng masira ang kompanya nga kanunay nagdaut sa atong pinangga nga Pangulong Rodrigo Duterte.
Sanglit wa akoy higayon nga makigkulukabildo kanila, nipahiyom ako isip respeto sa ilang mga opinyon labot sa isyu nga naglambigit sa konstitusyonal nga hisgutanan.
Ang quo warranto case gipasaka ni Solicitor General Jose Calida aron nga kung makombinsi ang mga mahistrado sa Korte Suprema sa ilang argumento, masira gayud ang kompanya.
Nahimong basehan sa pagpasaka og kaso mao ang pagtanyag sa kompanya og pay-per-view channel nga ABS-CBN TV Plus, ang KBO Channel, nga way pagtugot gikan sa National Telecommunications Commission (NTC) ug paggamit sa Philippine Depository Receipts (PDR) nga makakuha og investors sa langyaw nga kanasuran. Apan, gitubag kini sa ABS-CBN nga duna silay pagtugot sa NTC, Securities and Exchange Commission (SEC) ug Philippine Stock Exchange (PSE).
Ang gihimo sa OSG batok sa prankisa sa ABS-CBN usa ka "unconstitutional" nga lakang sa ehekutibo.
Nakalapas kini sa separation of powers sa tulo ka mga managsama og gahum nga sangang buhatan sa gobyerno nga mao ang ehekutibo, lehislatibo ug hudikatura.
Suma pa ni Cagayan de Oro Second District Representative Rufus Rodriguez nga wa nasubay sa Konstitutsyon ang pagpanghilabot sa ehekutibo sa Kongreso nga dunay gahum sa pagtugot sa prankisa nga ipailawom sa pag-amenda kung gikinahanglan man ang kaayohan sa kadaghanan.
Dugang pa niya, ang OSG di mahimong makapakansela sa prankisa tungod kay trabaho kini sa Kongreso ug usa kini ka paglapas sa gawasnon nga pamahayag nga gilatid sa konstitusyon.
Basin nakamatikod si Calida nga malugwayan gihapon ang prankisa sa ABS-CBN kung pasagdan lang ang Kongreso, mao nga iyang giduso ang kaso sa Korte Suprema kay halos tanang mahistrado niini, mga pinili man sa Pangulo, ug posibleng moboto sila pabor sa petitioner.
Sa akong nakita, napungot ang Pangulo sa kompanya tungod kay dayag kaayo nga kritiko sa iyang administrasyon.
Natural lamang kini sa mga nasud nga giilang "watchdog of government" ang media, nga kung naay sayop ang mga lider, batikuson gayud sila sa media.
Sa among nakat-unan sa policy making process, kabahin ang media sa pag-umol og maayong polisiya sa gobyerno, kini kung modawat ang mga lider sa pagsaway sa mga apektadong sektor pinaagi sa media.
Sa nahitabo karon, mas maayo nga tan-awon nila ang win-win solution sa problema sanglit mas labing apektado niini ang pamilya sa libuan ka mga ultimong mamumuo sa maong kompanya.