ADLAW’NG Huwebes, Pebrero 13, ilusad sa Department of Interior and Local Government (DILG)-Northern Mindanao ang kampanya nga gitawag og “Disiplina Muna”.
Gibutyag ni DILG-Northern Mindanao director Arnel Agabe nga usa kini ka government wide national advocacy campaign alang sa pagdisiplina sa katawhang Pilipinhon.
Parte kini nga kampaya sa Philippine Development plan 2017-2022 kung asa kini maoy pundasyon aron mahimong sentro ang katawhan ngadto padulong sa programa nga Ambisyon natin 2040 nga maglantaw isip usa ka lig-on, hayahay ug luwas nga kinabuhi alang sa tanan.
Ang katukoran niini nga Disiplina Muna national policy advocacy naghatag ug giya sa tanan nga mga local government units ug kadagkoan ahensya kini kalabot sa konsepto ug importansya sa kultura ug disiplina.
Kini aron masayran sa katawhan kung unsa ilang papel ug responsibilidad ug makaaghat kanila nga aktibo sa pagpartisipar sa pagpalambo sa nasod.
“Ang disiplina muna ang hinungdan ug tumong mapakusog nato ang suporta sa publiko sa nagkalain laing programa sa atong national government,” dugang niini.
Ang pito ka pillar sa Disiplina Muna campaign gilangkuban sa road clearing, disaster preparedness and resilience, anti-smoking, ease of doing business, liqauor ban, tourist spot cleanup ug padayon sa pag activate sa Barangay Drug Abused Council (BADAC).
Gilaumang motambong niini nga kalihokan mao ang mga local chief executives ug mga ulo sa dagkong ahensya aron mao gyod ang mangulo sa kampanya sa ilang tagsa tagsa ka munisipyo, siyudad ug ginsakopan.
“Mahibaw-an sa atong mga molupyo kung unsa ka kritikal ug unsa ka importante ang ilang partisipasyon sa atong lokal ug national nga pangagamhanan kay ang mga programa ni Presidente Rodrigo Duterte maoy programa nato sa DILG kini magmalampuson lang kung tabangan ta sa atong mga lomulopyo,” pahayag ni Agabe ug miingon nga importante kini nga programa tungod kay nakalatid sa executive order no. 24-2017 ni Presidente Duterte kung asa gihimo niini nga participatory claster ang tanan nga membro sa gabinete kung diin nagpasabot nga ang tanan kaparte sa pagpalambo ug pagpahapsay sa nasud.