DILI lang mga binuhing baboy nga layo sa African Swine fever nga sakit ang hugot nga gibantayan karon sa Provincial Veterinary Office sa Misamis Oriental sa pagpanguna ni Dr. Benjamin Resma apan lakip sab ang pagbantay nga dili masudlan ang lalawigan sa hulga sa bird flu ngadto sa mga binuhing manok, itik ug uban pa.
Kini human migawas ang report nga didto sa nasod sa China adunay bird flu outbreak nga mipatay sa mukabat 4,000 ka mga manok. Bisan sa India ug Europe, gikabutyag nga natakboyan usab sa maong nga sakit ang ilang binuhing manok.
Si Resma niingon nga dinhi sa lalawigan wala pay natala nga kaso kalabot niini ug bisan ang nasod sa Pilipinas.
Matud niini nga kung aduna man pagsakit sa mga manok ila dayon kining susihon deretso ug pugngan na daan aron dili na kini motakod pa sa uban nga mga binuhing manok.
Gani padayon ang pagsusi sa mga poultry dili lang sa lalawigan apan lakip sa dakbayan sa Cagayan de Oro.
Dugang ni Resma nga matag-entry ug exit point sa Misamis Oriental gibantayan ug gisusi ang mga moabot nga mga mananap kay basin unya modala ug sakit ug motakod dinhi sa lalawigan. Nasayran nga ang Rehiyon 10 maoy ikatulo sa tibuok Pilipinas nga nag-produce sa manok nga mokabat sa 19.5 milyon matag tuig.