GISUTA na sa Anti-Kidnapping Group ang numero nga nanghulga sa prinsipal sa Misamis Oriental General Comprehensive High School (MOGCHS) nga dunay bomba niadtong Pebrero 10 mga alas 12:40 sa udto sa Velez Street, dakbayan sa Cagayan de Oro.
Human sa maong hulga, nasayran nga gikansela ang klase alang na usab sa pagpaniguro sa kaluwasan sa mga magtutungha ug sa tanan ug swerteng negatibo kini sa ekspolosibo human nga gisusi sa kapulisan ug Explosive Ordnance Disposal (EOD).
Nakadawat ang school principal og hulga pinaagi sa text nga nag-ingon, “A bomb will explode inside your campus at exactly 1:00 many students will die”, rason nga gitaho gyud dayon kini sa mga otoridad ug gikansela una ang klase.
Gibutyag ni Police Captain Ernesto Sanchez, hepe sa Police Station 2 (PS2) sa Cogon, nga dunay wala mailang numero sa mobile phone nga nag-text ug nanghulga sa prinsipal.
“Anonymous number gi-forward na nato para ma-trace tong number sa nagbinuang,” matud ni Sanchez.
Giingong kung maila ang nahisgutang suspek mag-atubang kini sa PD 1727 o pagpakatag og mga walay kamatuorang impormasiyon o pagpanghulga nga may kalambigitan sa mga bomba, eksplosibo ug uban pa.
“Kung ma identify nato makasohan gyud siya sa Presidential Decree 1727,” dugang niini.
Gi-aghat usab niini ang tanang katawhan nga ireport gyud dayon ang susama niini aron nga maaksiyonan gyud sa kapulisan tungod kay ila kining gikonsidera nga dunay kamatuoran ug dili angayang magkumpiyansa alang sa kaluwasan sa tanan.
“Tanan mga bomb scare kami kapulisan amo gyud gina-treat as real tanan proseso tanan ato gyud na i-apply ato gyud i-treat as serious,” dugang niini.