GIREKOMENDAR sa City Legal Office (CLO) ang pag-uyon sa deed of donation sa 10,000 square meters nga yuta sa South Road Properties ngadto sa Commission on Audit (COA) para matukoran sa ilang bag-ong edepisyo.
Si City Attorney Rey Gealon nagkanayon nga ilang giduso ang pagpirma ni Mayor Edgardo Labella sa habig sa City Government ug Chairman Michael Dominggo sa COA human ilang nasuta nga legal ang terms and conditions.
“The CLO pushed for the approval of the deed of donation of a parcel of land at SRP for the COA Building. This was reached after thorough evaluation of the terms and conditions of the said deed”, padayag ni Gealon.
Si Gealon nihulagway nga plano ni Labella ang pagbutang og government center sa SRP diin mahimutang ang tanang government agencies aron dali ug paspas ang pagtunol sa mga batakang serbisyo.
Una niini, si Marilou Rizarri, officer-iIn-charge sa COA-VII, nipadala og suwat ngadto kang Labella niadtong Nobiyembre 5 sa miaging tuig para sa pagpangayo sa maong luna aron aduna nay desenting lugar ang ilang regional office.
Apan gipadayag sa pangulo sa CLO nga human sa ilang rekomendasyon, nagkinahanglan pa kini og resolution sa City Council nga maoy maghatag og gahom ni Labella pagpirma sa deed of donation. (PAC)