GIPANGULOHAN ni Los Angeles Lakers forward LeBron James ang superstars nga gilaumang manuwa sa Team USA alang sa Tokyo Olympics nga ipahigayon karong Hulyo sa Japan.
Sa kinatibuk-an, miabot sa 44 ka mga magduduwa ang gilista nga finalists sa USA Basketball aron molangkob sa Team USA nga magtinguhang ibangon og balik ang dungog sa ilang puwersa human sa mangil-ad niining kampanya sa miaging FIBA World Cup sa China diin igo lang nahimutang sa ikapito ang mga Amerikano.
“The commitment, desire and excitement of all of our athletes to represent their country is genuine and remarkable,” matod ni USA Basketball managing director Jerry Colangelo.
“All of the finalists are exceptionally gifted athletes who offer us amazing versatility and depth, and the group of finalists features a range of players from those who are very experienced and accomplished in international basketball to players who will be future international stars.”
Si James, kinsa usa ka two-time gold medalist sa Olympics, nahilakip sa superstars nga ningbalibad pagduwa sa miaging World Cup apan determinadong moagak og balik sa dungog sa Team USA ning higayuna.
Sa tanang sakop sa national pool ning higayuna, 19 ka mga magduduwa ang nakatigom na og kinatiguk-ang 31 ka gold medals gikan sa Olympics o World Cup, nga pulos matag upat ka mga tuig nga kompetisyon.
Wala na’y tyrouts nga ipahigayon alang sa pagpili sa Final 12 nga morepresentar sa Team USA.
Ang USA Basketball mobutyag sa ilang mapiliang mga magduduwa nga molangkob sa Final 12 karong Hunyo human nila masuta ang kahimsog ug sitwasyon sa tanang finalists.
Nahilakip sab sa finalists ang mga kauban ni James sa Lakers nga sila si Anthony Davis, Dwight Howard, Kyle Kuzma, ug JaVale McGee.
Naa sab sa listahan ang sama ni James nga kanhi mga MVP nga sila si Stephen Curry sa Golden State Warriors, James Harden ug Russell Westbrook sa Houston Rockets, ug Kevin Durant sa Brooklyn Nets.
Nahilakip sab sila si Jaylen Brown, Gordon Hayward, Marcus Smart, Jayson Tatum, ug Kemba Walker sa Boston Celtics, Joe Harris ug Kyrie Irving sa Brooklyn, Andre Drummond ug Kevin Love sa Cleveland Cavaliers, Mason Plumlee sa Denver Nuggets, Draymond Green ug Klay Thompson sa Golden State, Malcolm Brogdon, Victor Oladipo, ug Myles Turner sa Indiana Pacers, Paul George, Montrezl Harrell, ug Kawhi Leonard sa LA Clippers, Bam Adebayo ug Jimmy Butler sa Miami Heat.
Mokompleto sa national pool mao sila si Brook Lopez ug Khris Middleton sa Milwaukee Bucks, Brandon Ingram sa New Orleans Pelicans, Chris Paul sa Oklahoma City Thunder, Tobias Harris sa Philadelphia 76ers, Devin Booker sa Phoenix Suns, Damian Lillard sa Portland Trail Blazers, Harrison Barnes sa Sacramento Kings, LaMarcus Aldridge, DeMar DeRozan, ug Derrick White sa San Antonio Spurs, Kyle Lowry sa Toronto Raptors, Mike Conley, ug Donovan Mitchell sa Utah Jazz ug Bradley Beal sa Washington Wizards. (AP, ESL)