GIPAMATUD-AN sa San Miguel Beermen nga aduna gihapon sila’y saktong ikabuga bisan wala ang higanteng Sugboanon nga si JuneMar Fajardo pinaagi sa pagmakmak sa Rain or Shine Elasto Painters, 77-63, sa usa ka tune-up game kagahapon sa Acropolis Gym sa Manila.
Haw-ang man tuod ang ilawom nga bahin sa Beermen apan ilaha kining gibawi pinaagi sa ilang duwa sa gawas nga gibidahan sa maidlas nilang pointguard nga si Terrence Romeo.
Usa ra man tuod kini ka tune-up game apan ang dakong kadaugan mahinungdanon alang sa Beermen aron makakuha sila’g dugang kadasig sa ilang pampanya sa umaabot nga sa Philippine Basketball Association (PBA) Philippine Cup nga sugdan karong Marso 8.
Si Fajardo, kinsa produkto sa University of Cebu (UC) Webmasters, dili makaduwa sa kinatibuk-ang Philippine Cup gumikan kay nabali ang tuo nga bitiis niini atol sa praktis sa Beermen.
Gituohan nga dugay pa’ng makabalik og duwa ang lumad nga taga lungsod sa Pinamungajan, Cebu gumikan sa grabe nga pagkaangol niini hinungdan nga kinahanglang niini pa lang ka sayo, maanad nang daan ang Beermen nga mokombati nga wala ang 6’10” nga magduduwa.
Gawas kang Romeo, namuntos sab sila si Marcio Lassiter, Alex Cabagnot ug Chris Ross alang sa Beermen.
Sila si MoTautuaa ug Billy Mamaril ang nagpulipuli og sulod aron matapakan ang haw-ang nga nabiyaan ni Fajardo. “There’s a lot of teams counting us off, but we’re here, we’re working hard and we have enough talent to compete and win the championship,” matod ni Ross.
Ang Beermen nagtinguha nga makalangkat sa rekord nga unom ka sunodsunod nga titulo sa Philippine Cup. (ESL)