MOBALIK ang usa sa labing maayong nakaduwa sa mga sakop sa Gilas Pilipinas sa miaging 30th Southeast Asian Games alang sa laing misyon sa national team.
Si Alaska Aces big man Vic “Muscle Man” Manuel giimbitar aron mosalmot sa praktis sa Gilas Pilipinas alang sa kampanya niini sa first windo sa FIBA Asia Cup qualifiers nga ipahigayon sa ulahing bahin ning buwana.
Sa labing una niyang pagduwa sa national team, si Manuel nag-average og 15.6 puntos ug 4.2 rebounds sa kampanya sa Gilas Pilipinas sa SEA Games niadtong Disyembre sa miaging tuig diin nakuha sa mga Pinoy ang gold medal.
Gawas kang Manuel, ang Samahang Basketbol ng Pilipinas (SBP) ug Philippine Basketball Association (PBA) nagpadala sab og imbetasyon kang Abu Tratter, laing sakop sa Alaska.
Ang duha ka Aces mao ang labing ilahing nahidugaang sa national pool nga mosugod og duwa sa FIBa Asia qualifiers karong Pebrero 20.
Kinahanglang mokuha og big men ang Gilas Pilipinas gumikan kay dili makaduwa sila si Fil-Am Christian Standhardinger ug Mac Belo, kinsa pulos adunay angol.
Nibalibad sab pagduwa si Japther Aguilar ning higayuna gumikan kay bag-o lang kining nagminyo ug kasamtangan kining naa sa honeymoon.
Ning bag-uhay lang, gikuha sa Gilas Pilipinas ang serbisyo ni Phoenix Fuel Masters center Justin Chua.
Ang ubang mga magduduwa sa PBA nga naa sa national pool mao sila si Troy Rosario, Roger Pogoy, Ray Parks Jr., Matthew Wright, Poy Erram, CJ Perez, Marc Pingris, ug team captain Kiefer Ravena.
Naa sab ang umaabot nga PBA players nga sila si Isaac Go, Rey Suerte, Allyn Bulanadi, ug ang magsuong sila si Matt ug Mike Nieto.
Ang amateur players nga naa sa national pool mao sila si Thirdy Ravena, Dave Ildefonso, Jaydee Tungcab, Kobe Paras, Justine Baltazar, Juan aug Javi Gomez de Liano, ug Dwight Ramos. (ESL)