Diputado: Husto ba ang ban?

NINDOT paminawon nga nagpasalig ang atong mga kadagkoan sa gobierno nga duna silay gihimo nga pagpangandam batok sa mga lain-laing sakit o kalamidad sama sa African Swine Fever (ASF) o kaha ang gikaintapan nga NCov virus.

Unsa nga pagpangandam ang ilang gipasabot, nga dili makasulod o kon makasulod na?

•••

Kon dili makasulod ang ASF, nindot kini kon hugot gyod nga pagpangandam ang ilang gihimo. Pasabot, walay bisan gamay nga luna nga makasulod ang mga depektoso nga mga baboy o mga produkto gikan sa karne nga baboy.

Ang problema kay sama kini sa dakpanay sa ikog sa mga nagdumala sa gobierno ug sa mga negosyante.

Pananglitan, dili pwede nga mobiyahe og baboy kon walay husto nga papeles.

Unsay gihimo sa mga biyahedor og baboy? Mobiyahe sila sa ilang mga baboy sa tungang gabii o kadlawon sakay sa mga pumpboat ug anha sila modunggo sa mga baybayon nga walay nagbantay.

Lisod kini masakpan tungod sa kalapad sa atong mga baybayon sa tibuok rehiyon.

Usa kini sa mga palusot nga ilang gihimo aron lang makapadayon sa ilang negosyo bisan pa man sa gitawag og “lockdown.”

Kon nahimo kini, buot ipasabot dunay kahigayonan nga makasulod gyod ang sakit nga ASF sa atong rehiyon.

•••

Kon makasulod na kini, husto ba ang atong pagpangandam?

Sa akong nahibaw-an, dunay dakong kakulangan ang kadaghanan sa atong mga probinsiya sa rehiyon.

Kasagaran, wala silay andam nga personal protection equipment (PPE) nga maoy gamiton sa mga mokuha sa blood sample sa mga apektadong baboy, walay power sprayer o bisan stun gun. Kasagaran walay gihimong pangandam kon dunay outbreak, kinsay molihok, unsay ilang buhaton, unsaon pagpatay, asa ilubong, unsaon paglubong, unsay buhaton sa dili pa ilubong, ug uban pa.

Ang uban, walay andam nga kwarta para magasto kon dunay outbreak.

Buot ipasabot, kon dunay outbreak, mao pay iandam kon unsay buhaton.

Husto ba kini?

•••

Dunay ban karon sa mga produkto gikan sa Mindanao. Gidili ang pagpasulod sa mga baboy ug mga produkto gikan sa baboy nga gikan sa Mindanao.

Apil na niini ang mga feeds nga gikan sa Mindanao ug Luzon.

Asa man ta mopalit og feeds?

Paigo ra ba atong supply sa umaabot nga mga semana, bulan o tuig kon dili kita mopasulod sa mga baboy gikan sa ubang lalawigan?

Unsay leksiyon nga atong nahibaw-an sa nahitabo sa Davao Occidental?

Matod pa, nakasulod ang maong ASF tungod sa swill feed gikan sa Indonesia o kaha gikan sa mga produkto nga gikan sa baboy.

Buot ipasabot, nakasulod gihapon ang ASF bisan pa sa lockdown nga gihimo batok sa mga produkto gikan sa Luzon.

Ang angay buhaton, hugtan nato ang atong border control, aron pagseguro nga husto ang patakaran nga gihimo nga ma-kwarintenas gyod ang tanang posible nga magdala sa maong sakit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph