SA MAKAUSA pa, mopakita na usab og aksiyon si Senator Manny Pacquiao sulod sa korte sa dihang ipahigayon karong adlawa ang 2020 Chooks-to-Go MPBL Lakan All-Star Game sa SM Mall of Asia Arena sa Pasay City.
Sa dili pa moapil sa Executive Game, si Pacquiao mosalmot sa mga batan-ong basketball stars sa Celebrity 3x3 game nga maoy moabli sa kalihukan diin iyang ikauban sila si Alvin Pasaol ug Troy Rike uban usab ni Thirdy Ravena, sakop sa national team.
“When we first met late last year, Senator Manny asked me if he could play in our league Chooks-to-Go Pilipinas 3x3. We wanted to make it special for him that is why we tapped the top young players in the country to play in this exhibition contest,” pasabot ni Chooks-to-Go president Ronald Mascariñas.
Ilang ikasangka mao ang Team ni Kobe Paras. Ang modaog ning maong special match adunay ganting P100,000 ug ingon man P50,000 alang sa mapildi.
Hinuon, tungod sa iyang injury sa abaga, si Paras dili makaduwa ug magsilbi na lang kining special guest coach sa iyang team nga langkuban nila ni Joshua Munzon ug kanhi FIBA 3X3 U-18 World Cuper Juan Gomez de Liano.
Anaa usab sa team ang aktor nga si Gerald Anderson sa Imus Bandera ug laing celebrity nga si Marco Alcaraz.
Human niini, ipahigayon na usab ang North vs. South 3x3 All-Star Game.
Moduwa alang sa North team mao sila si Jaypee Belencion, sa Pasay, JR Alabanza sa Bulacan, Paulo Hubalde sa Valenzuela, ug Aris Dionisio sa Manila.
Sa South anaa usab sila si Leo De Vera sa Zamboanga, Nick Demusis (Bacoor), Rodel Vaygan (Mindoro), ug Jayjay Helterbrand (Imus).
“Our players in the national team pool have been training hard since December and we needed to give them a breather. Hopefully, they enjoy this day of fun in the MPBL before getting back to work,” dugang ni Mascariñas. (JBM)