SUKAD ningbiya ko isip empleyado sa SunStar, kanunay na kong mouli sa among pinanggang lungsod sa Pinamungajan. Pila pud intawon ka tuig nga morag gikalimtan nako ning lungsora tungod sa trabaho.
Ang ka-relax sa akong schedule karon ang unang rason nganong makalugar na kog bisita sa among balay. Ang ikaduhang rason mao ning duha ka dalan nga gitawag og Manipis ug Bunga. Ambot unsay opisyal nga ngalan ining mga dalana, apan alang namo nga kanunayng mag-agian dinhi, Manipis Road ug Bunga Road ang tawag namo nila.
Manipis ang tawag namo anang dalan sugod sa eskina Tabunok, kanang ubos sa flyover (kanang daghang badlongon nga traysikol drayber), hangtod ngadtos Lutopan. Kon gikan kas syudad, mo-right turn ka dihang eskinaha.
Gikahadlokan kaayo ning dalana kaniadto. Kahinumdom ko sa bata pa ko, makapangadye intawon kog Amahan Namo basta moagi na mi anang labihan ka lawom nga mga pangpang. Pwerteng nipisa sa dalan ug liko-liko pa. Maong gitawag nig Manipis. Dili pa gyod sementado. Labihang aboga kon init, arang lapoka kon uwan.
Naay ubang parte nga usa ra ka sakyanan ang masulod. Ang ligid pila na lang ka dangaw ang distansya, ngabil sa pangpang na. Kon molantaw kas bintana, ang giladmon sa kimba ang imong makita. Kon naay kasugat, aw, moatras gyod ang usa balik sa agi. Kon maswertehan, molayat na lang ang sakyanan sa pangpang.
Ang kadaghan sa nangamatay kay nahulog ilang gisakyan sa Manipis ang nakahimong legendary ining dalana. Maghilak ang semana kon way balita nga naa na say nahagbong sa manipis. Walay survivor, moingon dayon ang balita, patay tanan. Magkurog dayon mi sa kahadlok.
Pagkahimo sa Naga-Uling Road, nakaginhawa mig dako kay naa nay laing agianan padung syudad. Apan karon nga grabe na ang trapik, wa na puy lami ang Naga-Uling Road kay moagi man kag Naga, Minglanilla, Talisay, Pardo, Bulacao ug Mambaling nga kaluoy sa Ginoo ang trapik di pud tantong makasapot.
Tungod sa trapik, ang biyahe padung Pinamungajan gikan syudad moabot usahay og tulo ka oras, upat kon magdungan og prosesyon sa pista ang mga kapilya ining mga lugara.
Karon nga lapad ug sementado na ang Manipis Road, ang among biyahe padung sa Pinamungajan usa ka oras ug baynte minutos na lang. Usa ka oras, kon magdali ang drayber kay naglain ang tiyan.
Ug ang Bunga Road? Atong hisgotan sa sunod nga kolum.