GITAPOS na sa Pilipinas ang Visiting Forces Agreement (VFA) tali sa Estados Unidos. Ang kasabutan tali sa Pilipinas ug Estados Unidos giaprobahan sa Senado sa Pilipinas niadtong 1999. Ang VFA naglatid sa legal nga mga basehanan sa paglihok sa mga sundawong Amerikano sa Pilipinas.
Ubos sa VFA, gipatuman usab ang Enhanced Defense Cooperation Agreement (Edca), laing supplemental nga kasabutan tali sa Pilipinas ug Estados Unidos niadtong 2014. Ubos sa Edca, gipahugtan pa ang kooperasyon tali sa militar sa nasod ug Estados Unidos.
Ubos sa VFA ug Edca, nibubo ang Estados Unidos og military assistance sa Pilipinas kay mas sayon na lang sa ilang armadong kusog ang pag-request og budget tungod sa mao nga mga kasabutan.
Unsay mawala sa nasod?
Gikan sa 2016 ngadto sa 2019, ang Pilipinas nakadawat og $267.75 million (P13.58) billion nga assistance. Gawas niini, duna usay $45 million (P2.2 billion) nga foreign military financing. Pinaagi sa FMF, ang armadong kusog sa nasod nakadawat og mga ekipo, parts sa military hardware nga iya sa Pilipinas apan nagkinahanglan og suporta sa Estados Unidos.
Karong tuiga ngadto sa 2021, makadawat ang Pilipinas og $200 million (P10.14 billion) alang sa abyon, training, mga ekipo ug construction alang sa Pilipinas. Dunay gitaganang walo ka mga helicopter og upat ka mga eroplano alang sa bag-ong aviation regiment sa Army. Wa pa ni labot sa 319 ka mga training tali sa mga Amerikanong sundawo nga makapalig-on sa armadong kusog, usa sa labing huyang sa Asya.
Gawas sa military aid, ang Estados Unidos naghatag usab og $336.30 million dollars sa scholarships, seminars ug uban pa.
Way mawala sa Estados Unidos sa pagwagtang sa VFA. Sa Pilipinas? Pwerteng dakoa. Naglisod gani tag pamalit og military equipment. Sa kakabus sa Pilipinas, naghinilas lang gihapon. Paet.