DUHA ka kaso ang gipasaka sa kagamhanan sa dakbayan sa Talisay batok niadtong lalaki nga nagpost og fake news kalabot sa Covid-19, Martes sa hapon, Pebrero 11.
Mismo si Legal officer, Giovanni Sususco, ang niduso sa mga kasong kalapasan sa Article 154 sa Revised Penal Code in Relation sa section 6 sa cybercrime law ug usurpation of public office, diha sa piskalya.
Kini gipasaka batok kang Jewel Louie Aviso. Ang main reklamante, mao ang pangulo sa Talisay City Disaster Risk Reduction and Management Office, Alvin Santillana, human usab nga gidala niya ang pangalan sa maong buhatan, atol sa iyang pagpost of fake news kalabot sa Covid19.
“Mamahimo hinuon (siya) makapyansa. Ang penalty sa violation sa Article 154, 6 months pagka-priso, apan kay upgraded siya kay cybercrime man moabot gyud og 6 years, in case convicted siya. Usurpation, kay dili na man siya member (sa TCDDMO),” saysay ni Atty. Sususco.
“It has also be our office kay kinahanglan walay magdala-dala sa name sa atong office, for the city pud, there has to be precedent nga kon maghimu ka og fake news, you should suffer the consequence, because you might create panic and mass hysteria, what will happen is that naa unyay problema nga moabot,” gipasabot usab ni Santillana.
Dugang ni Santillana nga unta magsilbi kini nga leksyon dili lang may labot sa kalibutanong panlawas nga isyu ang covid19, apan alang na sa kang bisan kinsa nga mopakatap og fake news ilabi na gamit ang social media.
Dili usab angay nga si bisan kinsa nalang ang mogamot sa pangalan sa buhatan, ug matud usab ni Santillana nga bisan kon kawani man gyud sa maong buhatan ang dili mahimo makapagawas og statement, kundi ang ilang pangulo lang.
Aron kini mahimo usab nga opisyal nga statement gyud.
“In fact my function gani is not to divulge information, kay that should be coming from the City health. Last Monday we had meeting, ako gipasabot kon unsay nahitabo sa inyo kauban, that will also happen to them, if they involved so much in social media. Information about anything that has to deal with our office, let the office, you don’t inform, don’t post, you are not authorized,” dugang ni Santillana.
Kahinumdoman nga bisan ang hunta probinsyal ang nipanday na og ordinansa pagpahamtang og tukma nga penalty batok sa mga magpost og fake news diha sa mga nagkalainlaing social networking site. (FMD)