ANG Land Tranportation Office (LTO 7) mo-distribute sa 31,167 ka mga registered plate sa mga sakyanan nga dunay upat ka ligid pataas sugod karon, Huwebes, Pebrero 13, hangtod Pebrero 19, sa Lower Ground Floor, City Wing sa SM Seaside City sa South Road Properties (SRP), dakbayan sa Sugbo.
Si Regional Director Victor Emmanuel Caindec sa LTO 7 nagkanayon nga ang maong nga plaka mao kadtong wala ma-release niadtong Enero hangtod Disyembre sa tuig 2015 ug 2016.
Ang distribution magsugod alas 10 sa buntag hangtod alas 7:00 sa gabii sa maong mga adlaw.
Si Mhike Jelord Rollo ang executive assistant sa buhatan ni Caindec nipahinumdom sa mga car owner pagdala sa ilang photocopy sa official receipt, certificate of registration ug ubang valid identification card sama sa driver’s license.
Kon dili makakuha ang tag-iya sa sakyanan, kinahanglan nga adunay special power of attorney ang iyang representante ug photocopy sa valid ID apil na ang tag-iya.
Si Rollo nidugang nga kadtong registered plates nga wala makuha sa 2017 ug 2018, mahikong makuha didto sa ilang tagsatagsa ka car dealer.
Ang pangulo sa LTO 7 nga si Caindec niingon nga walay apil sa maong distribution ang mga plaka sa motorsiklo gikan sa maong mga tuig sanglit nagpadayon pa ang plate production didto sa ilang planta sa LTO Central Office sa kaulohan.
Dugang ni Caindec nga walay dugang bayad sa pag-release sa maong mga lisensiyadong plaka. Giawhag nga magsayo sa pag-adfto sa ilang buhaton. (PAC)