DAGHAN na ang naapektuhan sa novel coronavirus sukad sa pagtumaw ining kagaw nga nagsukad sa nasud China.
Ang industriya sa turismo nag-antus sa hilabihan kay kalit ang pagkunhod sa mga langyaw kay gidid-an na nga mosulod sa atong nasud.
Daghan ang apektado nga mga negosyo gikan sa byahe sa mga eroplano, mga beach, hotel ug uban pa sa kalit nga kamingaw nga nasinatian karon.
Bisan ang pagtapok sa katawhan, pagsugat sa mga paryente ug paghatud ngadto sa airport gidili na karon aron paglikay nga mahimong biktima sa maong balatian.
Ang mga paugnat sa kusog nga unta mahimo sab nga kalingawan gikansila ni Mayor Sara Duterte-Carpio apil ang pag host sa Iron Man sa dakbayan sa Davao dili mahinayon sa unang gitakda nga eskedyul sa bulan sa Marso labi na kay daghang mga langyaw ang nagaapil sa maong paugnat sa kusog sa natad sa langoy, biseklita ug dagan.
Duha na ka tuig nga gipahigayon ang maong torneyo dinhi sa dakbayan ug giganahan ang mga miapil nga magbalik-balik dinhi tungod sa klima ug kahapsay ubos sa pagdumala ni Mayor Sara.
Mga lokal nga sports ug mga atleta namuypoy ang mga abaga tungod 35 ka mga paugnat sa kusog nga gipangandaman na unta sa mga coaches ang kalit nahimong daw damgo nga nahanaw tungod bawal ang panagtapok samtang naa pa ang hulga sa maong virus nga makatakod sa uban.
Andam ug han-ay na unta ang tanan apan tungod sa sitwasyon ug alang sa kaayohan sa tanan, mas gipili ni Maroy Sara nga magpahigayon lang og Misa alang sa pag-ampo ug pagpasalamat sa Labaw nga Makagagahum sa mga kaayuhan nga nadawat sa atong dakbayan.
Talagsa ug kausa ra nato saulogon ang Araw ng Dabaw matag tuig apan angayan sab sabton kung unsa ang panahon nga atong ginaatubang karon. Daghan pang kalipay ang atong mabatnan kung ang atong lawas piskay ug luwas ta sa mga sakit.