GIMANDO sa Regional Trial Court sa Bislig City ang pag-aresto sa founder sa Kapa-Community Ministry International’s (Kapa), kauban ang mga nag-unang mga opisyales niini ug promoters tungod sa kasong pagpanglimbong nga gipasaka sa Securities and Exchange Commission (SEC).
Ang Bislig City Regional Trial Court Branch 29 niadtong Pebrero 11 nag-isyu og warrants of arrest batok Kapa founder ug president Joel A. Apolinario, trustee Margie A. Danao ug corporate secretary Reyna L. Apolinario, uban sa mga promoters nga sila Marisol S. Diaz, Adelfa Fernandico, Moises Mopia ug Reniones D. Catubigan sa pagsupak sa Republic Act No. 8799, o ang Securities Regulation Code (SRC).
Sa pikas bahin, giakusahan sa DOJ ang Kapa og “willfully, unlawfully and criminally” nalambigit sa pagbaligya o paghanyag o pag-apud-apod sa securities sa Pilipinas nga way rehistro nga gipasaka ug giaprobahan sa SEC.
Tungod niini, gipasakaan og kaso sa DoJ ang KAPA, uban nila Mr. ug Mrs. Apolinario ug Danao, sa paglapas sa Sections 8(8.1), 26.1 ug 28 sa SRC. Giakusahan sab niini sila Diaz, Fernandico, Mopia ug Catubigan nga nagsupak sa Section 26.1 sa SRC sa pagpromotar sa investment scam ug gipasakaan og kaso.
Una nang nagpagawas ang SEC og advisory batok KAPA niadtong Marso 2017. Ug wala madugay nag-isyu og Cease and Desist Order niadtong Pebrero 14, 2019 ug Order of revocation sa KAPA’s Certificate of Incorporation niadtong Abril 3, 2019.
Sa interes sa naapektuhan nga investors, ang komisyon, pinaagi sa Anti-Money Laundering Council, nakakuha og Freeze Order gikan sa Court of Appeals niadtong Hunyo 4, 2019 aron sa pagpreserba sa “assets” nga nasubay ngadto sa Kapa.
Ang SEC padayon nga nagpahimangno ngadto sa publiko nga magbinantayon kay dunay mga suporter ug promoter sa KAPA nagpagawas og mga sayop nga impormasyon bahin sa pagbalik sa grupo.
“It is about time that the people behind Kapa answer the criminal charges filed against them,” matud ni SEC Chairperson Emilio B. Aquino.
“May this serve as a reiteration of the Commission’s resolve to stamp out investment scams and shield the investing public from fraud and other abuses in the corporate sector.” (WGM uban sa SEC PR)