Balay sa brgy. kapitana giatake; katabang gipatay

DAVAO DE ORO -- Gikondena sa katawhan ang pagpatay sa katabang ug pagkaangol sa 14-anyos nga babaye atol sa pag-atake sa gituohang mga rebeldeng New People’s Army (NPA) sa balay ni kapitana Rudilita Constantino sa Purok 9 , Barangay Kapatagan, Laak alas 8 sa gabii niadtong Lunes, Pebrero 10.

Patay si Neneng Tamonan, hamtong ang pangedaron, minyo, taga Dona Andrea sa nahisgutang lungsod samtang ang samdan mao si alyas Riza, taga Purok Kimataan 2, Barangay Gupitan, Kapalong.

Base sa inisyal nga imbestigasyon, lima ka mga armadong lalaki nga gituohang sakop sa NPA nga gipangulohan sa usa ka Christian Pastor alyas Khan CO sa Guerrilla Front 33, miabot sa balay ni Kapitana Constantino kon diin tulo niini nisulod sa balay.

Samtang ang usa ka armado nakaposisyon sa tindahan nga sumpay lang sa balay ug nagtion og armas sa umagad nga lalaki ni Constantino nga masuk-anong namulong kung nganong nitugot matud pa ang kapitana nga magbutang og bag-ong detachment sa mga sundalo sa nahisgutang barangay.

Samtang ang duha pa ka mga armado nisulod sa kuwarto ug gipangita si Constantino apan maoy naabtan ang katabang nga si Tamonan nga natulog ug sa way daghang istorya gipusil ang biktima sa makadaghang higayon tumong sa nagkadaiyang parte sa lawas nga misangko sa hinanali niyang kamatayon.

Laing duha pa ka mga armado nga nagsilbing “look-out” sa may gasoline station, haduol sa balay sa kapitana, nagtion sab sa ilang mga armas sa biktimang si Riza ug sa naka-duty nga barangay tanod nga ginganlan og Nole Lomiguid Moralde, 66, minyo nga taga Purok 11 sa nahisgutang barangay.

Gibutyag nga sa dihang namatikdan sa mga armado nga duna pay laing tanod ang naka-duty nga si Juan Daro Piodos, Jr., 59, minyo, ug nagtan-aw sa ilang gibuhat, gipusil sa usa ka suspek.

Apan ang bala naigo sa bangko ug nasamdan sa likod nga bahin sa lawas ang biktima nga si Riza.

Human sa insidente, mga suspek nanglakaw palayo sa lugar samtang mga biktima gidali pagdala ngadto sa Davao De Oro Provincial Hospital sa Laak apan ang biktima nga si Tamonan gideklarang patay na samtang si Riza padayong gitambalan.

Narekober gikan sa crime scene ang tulo ka mga basiyo sa bala sa kalibre .45 nga pistola.

Kapulisan sa Laak Municipal Police Station, uban sa mga sakop sa 60th Infantry Battalion sa Philippine Army, Charlie Company, naghimo og manhunt operation batok sa mikagiw nga mga rebelde.