INAHAN sa siyam ka bulang bata ang gikasuhan sa Women and Child Protection Desk (WCPD) human nalapwaan niini og init nga tinimplang gatas ang anak didto sa ilang pinuy-anan sa Barangay Abono, Aplaya, siyudad sa Digos.

Ang batang si Aljon (apilyedo gitago kay menor), naka-angkon og butoy-butoy sa iyang likod human mayabui og init nga tubig samtang nagtimpla og gatas ang iyang inahan sa nilabay nga gabii.

Ang inahan nga si Aileen (apilyedo gitago sa Superbalita) nag-atubang og kasong paglapas sa Republic Act (RA) 7610 kun physical abuse tungod sa insidente.

Apan, nangulipas kini nga gituyo niya ang nahitabo sanglit aksidente lamang ang tanan.

Giangkon hinuon sa inahan nga nahubog siya niadtong panahona samtang nagtimpla og gatas sa iyang anak.

"Nahubog ko unya mao to nalapwaan na hinuon nako kay nagunit pa man ko sa beberon," niya pa.

"Mangayo lang gyud ko og pasaylo kay wa man gituyo," ni Aileen.

Sumala sa amahan sa bata nga wa na siya'y plano nga moduso og kaso ngadto sa iyang asawa.

"Di na man nuon ko desisido sa kaso basta di lang niya usbon ang iyang gihimo ug usa pa di na pud ko gusto nga makigbalik pako niya," tataw sa bana nga wa na magpaila.

Apan si Inspector Melanie Hermosisima, imbestigador sa WCPD, nikanayon nga angay manubag gyud ang suspek gumikan sa grabeng nasinati sa bata.

"Kini man gud RA 7610, usa ni siya ka public crime so pwede ang si bisan kinsa ma-pulis man o prosecutor nga mopadayon sa kaso," niya pa.

Sud sa Davao del Sur Provincial Hospital (DDSPH) gidapatan og tambal ang bata aron di kini ma-impeksyon.

Niadtong Huwebes giingong nakagawas na kini human maatiman sa mga doktor. (Dondon Dinoy)