USA ka lalaki ang nadala sa ospital human nahaybol ang iyang gidraybang sakyanan didto sa Barangay San Roque, lungsod sa Nabunturan, Comval Province.
Giila ang biktima nga mao si Fernando Olarte, hamtung ang panuigon, molupyo sa Poblacon, lungsod sa Lupon, Davao Oriental.
Sa report gikan Comval Province Police Provincial Office nasayran nga nahitabo ang aksidente pasado alas 2:00 sa hapon niadtong Huwebes.
Nagdrive sa usa ka Suzuki Supercarry van nga gipanag-iyahan sa Philippine Postal Office ang biktima gikan siya sa lungsod sa Nabunturan padulong sa siyudad sa Davao.
Pag-abot sa dapit, na-overshoot ang biktima sa kurbada nga bahin hinungdan nga mituyok ang iyang sakyanan ug nahaybol.
Ang biktima nakahiagum og mga pangos ug bun-og sa kalawasan ug daling gidala sa ospital aron mapatambalan.
Kapulisan sa lungsod sa Nabunturan mihimo na karon og dugang imbestigasyon sa hitabo. (Marvin Pineda)