USA ka covenant signing ang himuon karong Dominggo sa siyudad sa Tagum alang ngadto sa mga kandidato nga nagpapili karong eleksiyon.
Ang maong covenant pangulohan sa buhatan sa Davao del Norte Police Provincial Office sa pakig-alayon sa Election provincial office.
Sumala ni Police Senior Superintendent Jose Pante, Provincial Director sa DNPPO, nga giawhag nila ang mga kandidato gikan sa konsehal ngadto na sa pagka-gobernador nga moduyog, mosalmot sa himuong covenant signing.
"We are encouraging all the candidates from governor down to the councilor to join our covenant for the incoming election," sulti ni Pante sa pakighinabi kaniya sa mga tigbalita.
Tumong sa kalihukan nga madasig ang mga kandidato nga makigduyog sa kampanya alang sa malinawon, hapsay nga piliay.
Atol sa maong panagtagbo mopirma ang mga kandidato, mosaad nga himuong limpyo ug malinawon ang umaabot nga eleksiyon.
Angay nga motuman sab ang mga kandidatu sa giya nga nakalatid sa "Fair Election Act."
Sa dili pa pormal nga sugdan ang aktibidad, himuon una ang santos nga misa pinangulohan ni Bishop Wilfredo Manlapas sa Diocese of Tagum City.
Karong umaabot nga Marso 26, sugdan na sab ang pagpangampanya sa mga kantidato diha sa lokal nga posisyon. (Marvin Pineda)