KAGAMHANAN sa Dakbayan Lapu-Lapu ug usa ka kapunuang Insik ang mihatag og computer sets ug libreng wifi sa Pangan-an Elementrary School, ang nag-inusarang eskuwelahan sa Isla sa Pangan-an, Dakbayan sa Lapu-Lapu Huwebes, Pebrero 13, 2020.
Sa usa ka turnover ceremony, gitunol ni Lapu-Lapu City Mayor Junard "Ahong" Chan ang mga computer sets ug wifi equipment ngadto kang Marilou Pacilan, ang principal sa maong tunghaan.
Kini subay sa saad sa mayor nga hataghan og computer sets ang mga tinun-an.
Kuyog sab sa okasyon si Zhao Shouqi, ang presidente sa Lapu-Lapu City Philippines Tourism Ethnic Chinese Guild Hall Corp., nga nanghatag og 13 ka computer sets sa kwerpo sa kapulisan.
Nipahinumdom si Vicky You, ang sekretarya sa kapunongang Insik, nga nihatag sab sila sa miaging tuig og 20 ka computer sets alang sa katukuran sa E-Library.
Proyekto ni Chan ang E-Library aron ang mga tinun-an adunay libreng magamit nga computer, libreng wifi ug libreng printing ug bond paper alang sa ilang research ug project.
Gibuksan pud sa mayor Miyerkules, Pebrero 12, ang Call Center Training Hub, inabagan sa The Results Companies ug sa ilang senior director Mike Clove ug operations director Elleane Tan Dicdican.
Sa maong kasabutan, ang dakbayan nihatag og luna samtang ang The Results Companies nihatag og 24 ka mga computer ug maoy mopahigayon og 10-day training.
Usa sa nakabenepisyo sa training si Reche Ycong, 18, taga Barangay Pusok ug anaa sa unang ang-ang sa kolehiyo. Mapasalamaton si Reche ilabi kay naundang siya pag-eskuyla og Hotel Management sa UCLM kay wa nay ikagasto.
Sigon niya nga kon makatrabaho na siya, makatabang na siya sa iyang amahan nga jobless ug makapadayon sa pageskuwela.
“Kining Call Center Training Hub libreng naghatag og training sa mga taga Opon nga gusto ma-level up ang ilang kahimtang, from minimum wage earner to more-than-minimum wage nga sweldo,” sigon ni Chan sa iyang speech.
Ang tanang gradwado sa Senior High ug taga Opon, mahimong mo-apply sa training hub.
“Human sa training, final interview dayon (aron masud sa trabaho sa The Results),” si Deojam Etrobañez nipasalig.