BANSALAN, Davao del Sur -- Dako ang panghinaut sa mga nailad nga sakop sa Kabus Padatoon (Kapa) Community Ministry International nga masikop na ang mga opisyal niini human hangtud karon naglaum gihapon sila nga mauli ang ilang gibubo nga puhonan.
Naguol kaayo si Elsa, 43, molupyo sa lugar, human nipanaw na ang iyang inahan niadtong Disyembre 2019 kinsa maoy nag-prenda sa ilang basakan sa kantidad P300,000 niadtong Enero sa miaging tuig.
Hangtud karon, di pa nila magamit ug mabahin sa iyang walo ka mga igsuon ang maong basakan sanglit prendado kini sa usa ka negusyante sa lugar.
Naminghoy si Elsa human nagsirado ang Kapa kay sa kadako sa kantidad sa prenda, maglisud na sila sa paglukat niini.
Apan human nakadungog nga nagmando na ang korte sa pagsikop sa mga nagpaluyo niini, nanghinaut siya nga matultulan na hain magtago si Kapa founder Joel Apolinario ug mga kaubanan niini.
Subay sa mando sa Regional Trial Court sa Bislig City nga arestuhon ang founder sa Kapa, kauban ang mga nag-unang mga opisyales niini ug promoters tungod sa kasong pagpanglimbong nga gipasaka sa Securities and Exchange Commission.
Ang Bislig City Regional Trial Court Branch 29 niadtong Pebrero 11 nag-isyu og warrants of arrest batok ni Kapa founder ug president Apolinario, trustee Margie A. Danao ug corporate secretary Reyna L. Apolinario, uban sa mga promoters nga sila Marisol S. Diaz, Adelfa Fernandico, Moises Mopia ug Reniones D. Catubigan sa pagsupak sa Republic Act 8799, o ang Securities Regulation Code.
Gikalipay sab ni Vicente, 45, molupyo sa Barangay Barayong, Magsaysay, Davao del Sur, ang mando sa korte ug naghinaut nga masikop ang mga nahisgutan sa hinanaling panahon.
Usa sab siya nga wa na makabawi sa gibubo sa Kapa human nga gipasirado kini sa gobyerno. (Orlando B. Dinoy)