SUPERBALITA DAVAO

Buros giatake'g aswang

Balitang Lokal

MABDOS nga bag-o lang nangabang og balay gikursonadahan og aswang kaadlawon kagahapon, Huwebes, didto sa Barangay Indangan, siyudad sa Davao.

Sumala pa sa kasaligang tinubdan, wala pay bulan nga nangabang ang magtiayon sa maong dapit kon diin gidungog na nga abatunon ang asawa.

Gikan matud pa ang magtiayon sa Cotabato ug nitapon sa nahisgutang lugar, ilabi na nga gitakda kining manganak sunod bulan ug duol lang ang mga balay tambalan.

Pagtapon pa lang sa magtiayon sa balay, namutang na sila daan og mga dahon ug sanga sa pomelo nga dunay mga tunok palibot sa ilang giabangan isip proteksiyon batok sa ungo.

Gawas niini, nagsul-ob sab og itom nga sinina ang mabdos nga asawa nga anaa pa sa 20 anyos ang pangedaron ug arangan og dagway kay base sa katiguwangan, pangbatok sab kini sa mga aswang.

Apan kaadlawon kagahapon, nagkagubot ang lugar human nga giatake suma pa og aswang nga pormang dako nga langgam.

Suma sa duha ka silingan sa buros nga sila alyas Dodong ug Ben nga samtang nagduyan-duyan sila gawas sa balay kay di pa katugon mga ala 1 sa kaadlawon, nasinati nila ang paghuros sa tumang kakusog sa hangin.

Sa ilang pagpanubay, usa ka dakong langgam nga daw isog kaayong nagbahis-bahis palibot sa balay sa buros.

Lantaw nila nga buot mosud ang aswang sa balay sa buros apan napakyas kay dunay mga panagang nga dahon sa buongon ug tunukon nga sanga niini nga gipamutang palibot sa balay.

Luyo sa kahadlok, ang duruha ka tambay nagdali-dali og panghaling gamit ang bunot ug kahoy aron abugon ang giingong aswang.

Sa pagkakaron, hugot pa nga nagbantay ang magtiayon ug wa pa masayri kon duna ba silay planong mobalhin og puyo tungod sa maong hitabo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph