NA-DISMISS na ang kaso sa lalake nga nasakpan nga nagdala og marijuana sa parking lot sa usa ka condominium sa Gen. Maxilom avenue sa Siyudad sa Sugbo niadtong Enero 19, 2020.
Apan ang kasong paghupot sa ilegal nga drugas ipasaka ngadto sa korte. Ang lalake mao si Jean Michael Estal, 24, kasamtangan nga nagpuyo sa Barangay Banilad, Siyudad sa Sugbo, nibisita sa buhatan sa Sunstar aron paghatag sa kopya sa order sa pagka dismiss sa duha sa iyang tulo ka mga kaso.
Ang Cebu City Prosecutor ni-dismiss sa kaso ni Estal nga kalapasan sa Section 15 sa Article 2 sa Republic Act (RA) 9165 kun Comprehensive Dangerous Drugs Act of 2002 kun paggamit sa ginadiling drugas.
Samtang, gi-dismiss usab ang kaso nga gisang-at batok niya nga adunay kalapasan ang City Ordinace no. 511, diin siya nasakmitan og kutsilyo. Sa maong kalapasan, adunay siyay multa.
Apan ang kaso ni Estal nga kalapasan sa Section 11 sa Article 2 sa R.A. 9165 nga paghupot og ginadiling drugas ipasaka ngadto sa korte.
Nadakpan kaniadto si Estal sa Abellana Police Station human nasakmitan ug tube nga adunay sulod nga dinugmok nga gituohan nga marijuana ug kutsilyo sa dihang nag-roving ang mga guwardiya sa condominium. (JCT)