DUHA ka mga lalaki ang kritikal ang kondisyon human gipanigbas niadtong Huwebes sa managlahing dapit.
Unang biktima mao si Roy Neljero, 37, minyo, lumad nga taga lungsod sa Malitbog, Bukidnon.
Lima ka mga samad tinigbasan ang naangkon sa biktima dihang giunay kini sa iyang kainom nga nailang si Jose.
Unang nakita si Neljero ug ang suspek nga nag-inom niadtong tungora apan pagpanguli kalit lang niining gitigbas ang biktima sa ulo, liog, abaga, kamot ug likod nga bahin.
Kritikal ang kondisyon ni Neljero nga anaa karon nagpatambalan sa Northern Mindanao Medical Center (NMMC) ning siyudad sa Cagayan de Oro. Samtang gipahigayon na sa kapolisan sa Malitbog Police Station ang man hunt operation batok sa suspek.
Samtang kritikal usab ang kahimtang ni Israel Yahem, 34, minyo, lumad nga taga siyudad sa Gingoog, Misamis Oriental ug kasamtangan nga nagpuyo sa Agora, Lapasan ning siyudad human gitigbas sa wala mailang suspetsado kagahapon mga alas 1:00 sa kadlawon.
Gituohang adunay deperensya sa pangutok ang suspetsado dihang pag-uli ni Yahem gikan sa panggabii nga trabaho gitabo ug gitigbas hinungdan sa pagkaigo sa ulo.
Nahibaw-an nga walay nakaila sa maong suspetsado sa maong dapit.
Gidala ang biktima sa Polymedical General Hospital ning panahona samtang ang kaso gisunod na sa kapolisan sa Police Station 3 sa Agora. (SVB)