TULO ka mga tunghaan ug usa ka barangay sa dakbayan sa Talisay nakadawat na sa mga school supplies ug sakong mga bugas ug sardines, tungod sa programa nga”Basura mo, Panginabuhian Ko”.
Gihimo ang pagpang-apud-apud Miyerkules sa hapon, Pebrero 12, sa buhatan sa mayor.
Moabot og 42 ka packs sa school supplies ang nahatag ngadto sa mga school principal o head, 30 niini ang alang sa Jaclupan Elementary School, walo sa alang sa Bulacao Elementary School ug upat sa Jaclupan National High School.
Pito usab ka sako sa tag-lima ka kilo nga bugas ug 16 ka lata sa sardinas ang gi-turn-over ni Talisay City mayor Gerald Anthony Gullas ngadto sa barangay Tabunok.
Gitug-an ni Lagrimas Abarquez ang pangulo sa Solid waste management office sa Talisay City hall nga ang pormal nga turn-over ang gihimo aron mas pag-aghat pa sa Talisaynon alang diha sa kalimpyo sa ilang matag lugar.
Kahinumdoman nga niadtong Septiyembre sa niaging tuig, gilusad ang Basura mo Panginabuhian ko.
Diin kadtong mga basura sa plastic kung moabot na sa usa ka kilo ang gibug-aton, ang mamahimo kini nga mailisan og usa ka de lata nga sardinas o tunga sa kilo nga bugas.
Alang kini sa kabarangayan. Samtang anaa usab ang alang sa mga tinun-an sa elementarya ug sa sekundarya, diin sa matag usa ka kilo nga basura sa mga plastic, aduna kini tugbang nga 10 points.
Ug kon aduna kanay 50 points, ang usa ka tinun-an ang makadawat og usa ka set sa school supplies.
Matud ni Abarquez nga ang barangay na ug tunghaan ang moapud-apud usab ngadto sa mga residente ug mga tinun-an nga nakatampo, hinungdan nadawat nila ang maong mga goods.
Samtang alang sa mayor nga tinguha lang gyud nila sa kagamhanan ang hinay-hinay nga pag-usab sa panghunahuna sa publiko sa dili pagpataka og labay sa basura, ug angay nga hipuson ug i-recycle kini kay daghan pa ang matabang usab niini diha sa inadlaw-adlaw.
“I had one thing in mind, changing our fellow Talisaynon’s mindsets when it comes to how they properly dispose their waste. This is only a start. We hope that more barangays, puroks and public schools will follow suit. We will continue to implement measures to ensure that we promote cleanliness in our city and make it more liveable for all,” saysay ni Gullas sa Superbaltia Cebu. (FMD)