HUGOT ang desisyon ni Gobernador Gwendolyn Garcia sa pagpatuman sa Executive Order (EO) 7 kalabot sa pag ban sa tanang mga produkto sa baboy, boar semen, pork-related products ug by-products gikan sa Mindanao tungod sa padayong pagkatap sa African Swine Fever (ASF) sa Rehiyon 11.
Kini taliwa sa pagpasabot ni Regional Director Salvador Deputado sa Department of Agriculture (DA-7) kabahin sa giluwatan nga Administrative Order No. 22 nga nagmando sa tanan nga ahensya sa gobyerno og lokal nga kagamhanan sa istrikto nga pagpatuman sa “National Zoning and movement plan for African Swine Fever.”
Matod ni Garcia nga wala siya’y angay kahadlokan tungod kay ang gitumbok nga rason sa maong mando mao ang istrikto nga pagpatuman og mga lakang pagpanalipod sa hog industry sa lokal.
Dugang niya, ang Luzon lang ang gitumbok niini nga lugar ug walay labot ang Visayas hinungdan nga ipadayon niini ang kamandoan pag ban sa mga produkto gikan sa Mindanao sulod sa 90 ka adlaw.
“I will stand by my order because this is an administrative order from Medialdea... This is only Luzon, so ila ko hadlok-hadlukon? Unsa man ang unod niini, kay moingon man dayon sila si Digong na baya ang ni-issue. Yes, through Secretary Medialdea pero unsa man gyuy unod ani? It does not even talk about Cebu or Davao Region. Now there are reports ni-spread na sa Bukidnon,” matod ni Garciasa pakighinabi sa mga tigbalita kagahapon, Pebrero 12, 2020.
Sa Pebrero 3, 2020 gikompirma sa Department of Agriculture (DA) ang positibo nga resulta sa gihimong pakisusi sa 1,000 ka mga patay nga baboy sa Davao Occidental hinungdan sa pag-lockdown na sa movement sa mga baboy sa slaughterhouses sa Malita ug Don Marcelino.
Atol sa panagtigom sa mga gobernador sa mga lalawigan sa Malacañang, gipahibalo ni Garcia nga may mga kolor na ang pipila ka bahin sa Mindanao nga mao ang Davao Region.
“National zoning and movement plan, ang kolor sa Davao region dark green, atong pag present sa amo with the governors colorado na ni nia ang Davao region. So what I’m trying to say is, this is such a fast moving disease that what could be green now with just one case this could immediately turn to yellow. But whether you like it or not infected na gyud na. Nya kung sundon na nato ilang gusto kinahanglan free transport gihapon of items. Ang nakadaot man gud mura man ang mindset sa department is more on pilay i-bayad kung patyon na ang mga baboy. Mangutana na sila pila kuno ang atong i-set aside inkaso ug patyunon na kuno o i-cull na ang mga baboy ba,” matod ni Garcia
Sa iyang bahin si DA 7 Regional Director Salvador Diputado wa mouyon sa lakang pag ban sa mga produkto gikan sa Mindanao sulod sa 90 ka adlaw tungod kay may mga tawo nga mangita gihapon og paagi nga makalusot ang mga produkto sa baboy paingon dinhi sa Sugbo.
“I don’t agree personally, I don’t agree nga ma ensure nato nga dili gyud makasulod kay right now sa akong nahibaw-an mosud na sa Cebu ang mga baboy pinaagi sa pumpboat in the middle of the night or early dawn, which means di ni nato ma control nga movement. Mao ni problema plus duna pa karo’y mga pork processed and pork by products nga makasud dinhi through some devious means. For example i-commingle nila ang pork sa chicken,” matod ni Deputado.
Matod ni Diputado nga kinahanglan lang nga i-align sa lalawigan ang ordinansa o kamandoan niini sa administrative order nga gipagawas sa kaulohan pagsanong sa mando sa Presidente.
“So pinaagi sa atong zoning plan nga hugtan lang gyud nato ang atong border control. Ang nahitabo karon didto sa Davao is proof nga bisan mag lockdown ta makasud ra gihapon ang ASF,” matod ni Deputado.
“No, we are not going to appeal to her. Ang amo lang is, pahibaw-on namo si Gov nga naay mando si Presidente. It’s up to her if mo-comply siya or not. It’s not our job. Duna man po’y noble intention si Governor nga this is part of her police power which is in the Local Government Code. Pero whether she will comply or not that’s not for us to say. It is just in the approach nga nag- differ sila. Ang ato lang i-align lang nato tanan ang atong mga local ordinances and issuances sa gi-draft sa DA kay mao nay order sa President,” dason ni Deputado.