SA PAGSAULOG sa adlaw sa gugma, Biyernes, Pebrero 14, kapulisan sa Talisay nipahimangno sa publiko nga magbantay sa kaugalingon ug sa ilang mga butang sa ilang pagsuroy.
Gitug-an ni Police Major Gerard Ace Pelare, hepe sa Talisay City Police Station, nga ila na daang gipangandaman ang pagdagsa sa daghang mga tawo sa malls, kan-anan, plaza ug uban pang lugar nga laaganan.
Ilabi na nga tingsweldo usab sa Biyernes.
Wa may kalahian sa ilang pagpakatap sa ilang mga personnel, ning Valentine’s Day, kay kada adlaw ang ilang hugot nga police visibility, mga pag-roving ug random checkpoint.
Apan iyang pahimangno sa uban, ilabi na sa mga manag-uyab, nga magsaulog, nga di lang sa mga lugar nga ngitngit ug way kasiguruan ang ilang kaluwasan.
Matod ni Pelare nga sagad isiaw ang mga mangsalisihay, kawatan ug ubang mapahimuslanon panahon ning magdasok ang mga tawo.
Usa usab sa tambag niya ang “Diha sa pag-date, dapat legal ang imong ka-date,” aron kalikayan ang gubot kon mahitabo nga magkasapanay. Ilakip nila sa pag-roving ang mga lodging house, inn, motel ug hotel.
Kini aron kapugngan, nga adunay pugos nga gikuyog, o menor nga gikoyug, ug mohimo sa ilegal, sama sa pagpamaligya og drugas sa sud, ug sa mga reklamo unya sa mga asawa ug bana nga adunay laing gikakuyog ang ilang mga pares.
Samtang kon sauna adunay mga pakulo kasagaran ang matag estasyon, ilabi na sa TCPS, ning tuiga nga Valentine’s Day, pag-ampo ug pagpadayon diha sa ilang pag-duty ang himuon.
Kini isip usa sa paagi sa ilang pagpakita og pagbangutan sa kamatayon sa ilang kauban sa Police Regional Office-7, nga si Police Master Sergeant Maximino Macua Jr. kinsa napatay atol sa anti-drug operation sa Dakbayan sa Sugbo.
“Imbes nga mag-celebrate mi sa Police station, do the usual nga pag-duty imo, kay we are still mourning sa kamatayon sa among kauban sa buhat,” saysay ni Pelare. (FMD)