KALIHIM sa Office of the Presidential Assistant for the Visayas (Opav) Michael Dino niawhag sa Overseas Filipino workers OFW’s nga gikan sa Taiwan nga nagdumili pagpaubos sa 14 ka adlaw nga quarantine nga mosunod sa mando sa gobyerno aron mahimong luwas sa coronavirus disease (Covid-19) ang publiko.
Apan ang 21 nga tipik sa gi-quarantine papaulion na sa Mindanao. Duna nay giandam nga flight.
Nagubot kadali ang Mactan Cebu International Airport (MCIA) niadtong Miyerkules, Pebrero 12, human nga ang 78 ka mga OFW nga gikan sa Taiwan nagdumili nga mopaubos sa quarantine nunot sa mikatap nga Covid-19.
Nibahad ang maong mga OFW nga mopasaka silag kaso sa mga opisyal sa tugpahanan sa Mactan lakip na sa Department of Health (DOH) kay gibabagan sila nga makapauli sa dakbayan sa Bacolod.
Apan si Dino nipasabot kanila atol sa press conference sa PRO 7 nga bisan wa sila hilanti gikan sa maong nasud, apan kinahanglan sila nga mosunod sa kamandoan sa DOH.
Ang Taiwan lakip sa ban nga gipatuman sa kagamhanan human usab gidili pagsulod dinhi sa mga abyon gikan sa China ug administrative regions sa Hong Kong ug Macau.
“They came from a quarantinable place so they have to be quarantined. So, I hope they also understand. This is to protect not only yourself, but also the Cebuano’s or the Filipino community for that matter. Even you’re protecting also your family. Can you imagine kung naa ka dili ka magpa quarantine, puyo ka sa inyo, sigurado affected ang imong tibuok pamilya,”matod ni Dino.
Papaulion
Apan si Cebu Governor Gwendolyn Garcia niingon nga papaulion ang mga taga Mindanao.
Matod niya nga dunay giandam sa Mactan Cebu International Airport Authority (MCIAA) nga biyahe sa mga pasahero nga taga Mindanao alang sa pagpauli sa ilang lugar.
Kini maoy gipahibaw ni Garcia atol sa pakighinabi sa Superbalita Cebu pinaagi sa tawag sa telepuno sa Pebrero 13, 2020 sa hapon. Sa Pebrero 13, 2020 atol sa pag bisita sa Superbalita Cebu sa pasilidad aron sa pagkuha og hulagway, buot sa mga pasahero nga mo paduol ang mga nagkuha og hulagway o video aron madunggan sila sa ilang mga reklamo.
Reklamo sa mga Persons Under Monitoring (PUMs) nga way tubig, way tarong nga kuryente ug pasilidad. Pipila usab ang nagreklamo sa pagkaon.
Matod ni Garcia nga mas maayo og mouli na lang ang maong mga pasahero kaysa mag sigi og reklamo sa giandam nga pasilidad sa evacuation center nga anaa sa Brgy. Apas, Dakbayan sa Sugbo.
“Sige nalang kay mas anad siguro ni silag kuan. Manguli naman ni sila. Na-arrange nana between our office. Unya si MCIAA General Manager Steve Dicdican duna na’y PAL flight nga ilang sakyan. 21 na ni sila kabuok nga taga Mindanao. Karong gabii ang flight, but in the meantime, giadto nana sila kay sige man na sila og reklamo. Ang saba gyud kaayo kaning taga Mindanao, taga Davao”, matod ni Garcia.
Si Garcia nagkanayon nga nanghinobra ang reklamo sa mga pasahero ug wa mosabot nga mao lang ang kapasilungan nga mahatag sa lalawigan ug di makahatag og mahalon nga kapasilongan. Sa nasayran, 30 ka mga pasahero ang anaa sa pasilidad sa lalawigan.
Gipasabot ni Garcia nga gipasusi na niya ang pasilidad ug may tubig ug kuryente, apan tungod kay nagdungan pag-abot ang mga pasahero, naka sinati kini og kakulian.
“Kato nang gikan sa Mindanao mao nay mga reklamador kaayo. Unya naa may tubig. In fact, nahuk-an lang gyud mi kagahapon, pero nangandam intawn mi as best as we can. Naa may tubig, naay kuryente, gipanglimpyohan na na pero maybe dili sa ilang standard kay basin mansion ang ilang gi expect no. At any rate, duna nay gi-arrange nga pwede nana sila ipada pauli sa Davao. Naay uban nga taga lligan”, matod ni Garcia.
Tungod kay puno na man ang pasilidad nga iya sa Department of Health (DOH) og ang Women and Childrens Center, gawas sa evacuation center gitanyagan usab sila sa laing pasilidad nga anaa sa Pinamungajan sa habagatan nga bahin sa Sugbo, apan nagdumili sa pagbalhin.