GITUOHAN sa kapulisan nga mga sakop sa Ozamiz ug Kerwin Espinosa drug group ang naengkwentro nila ni anhing Police Master Sergeant Maximino Macua ug kaubanan sa Police Drug Enforcement Group (PDEG) 5 sa usa ka surveillance, di buy-bust, sa Barangay Mambaling, Dakbayan sa Sugbo niadtong Martes sa gabii, Pebrero 11, 2020.
Si Police Regional Office (PRO) 7 Director Police Brigadier General Albert Ignatius Ferro niingon nga nibalik na og operate ang Ozamiz ug Espinosa drug group sa Central Visayas.
Nagtuo siya nga naghiusa ang duha ka mga grupo ug nikuha sa serbisyo nila ni Franco Obeso ug kaubanan.
Si Obeso ang gikapinusilay nila ni Macua dihang nakabantay nga sila mga pulis.
Samdan si Obeso sa engkwentro ug nadakpan sa kapulisan sa Vicente Sotto Memorial Medical Center (VSMMC) diin siya gidala ni Jeramae Zafra.
Si Zafra gidakop sa kapulisan.
Sa imbestigasyon sa kapulisan, ilang nahibaw-an nga hardcore criminals ang naengkwentro ni Macua.
Mao kini ang responsabli sa mga patay sa ilang kontra sa illegal nga drugas.
Kaniadto, dihang si Ferro pa ang nangulo sa PDEG, na-monitor nila nga ang Ozamiz drug group ug kang Kerwin mibalik sa ilang illegal drug trade sa Central Visayas.
Usa siya sa nidakop kang Espinosa sa Abu Dhabi sa United Arab Emirates (UAE), ug sa miyembro sa Parojinog family nga si Ardot.
“We believe this group is an organized gun for hire that are involved in the collection of payment for drug syndicate here in the province,” matod ni Ferro.
Gipahimangnoan sa heneral ang mga personnel nga gitahasan sa pagpangita sa kaubanan niini nga di mokompyansa tungod kay armado ug mahimong mosukol sa kapulisan.
Nagbangutan
Naka half mast na ang tanang bandila sa mga buhatan sa kapulisan lukop rehiyon pagpakita sa ilang kasubo sa kamatayon ni Macua nga napatay atol sa anti-drug operation.
Matod ni Ferro nga di niya mapugngan nga motulo ang luha sa gidangatan ni Macua tungod kay kini ang nisugat kaniya sa airport atol sa iyang pag anhi sa Sugbo sa milabayng semana.
Gisaad niya nga ang tanang benepisyo ni Macua gikan sa Philippine National Police (PNP) ihatag ngadto sa nahabiling pamilya lakip na ang paghatag usab sa full military honors atol sa lubong sunod semana.
Karong buntag, Biyernes, Pebrero 14, dalhon sa Saint Ignatius chapel ang lawas ni Macua, diin hayaon kini sulod sa usa ka gabii aron makapanamilit ang iyang mga kauban sa trabaho.
Pagka Sabado itabok na kini sa Probinsya sa Bohol nga maoy pagbuot sa asawa niini.
Si Office of the Presidential Assistant for the Visayas Secretary Michael Dino misaad nga ang iyang buhatan mohatag og financial assistance sa pamilya, lakip na ang libreng pagpatungha sa duha ka anak ni Macua nga mao usab ang mando ni President Rodrigo Duterte.
Hatagan usab silag libre nga balay gikan sa National Housing Authority aron di na mag lisud ang pamilya.
“Naay taga DepEd nga moari diri, DSWD. Naay taga national housing moari para mo suporta sa pamilya sa namatyan,” matod ni Dino.
Nagmerida
Usa sa gikahibulongan niadtong Martes sa wa pa moadto sa trabaho si Macua, nangayo kini og hulagway sa iyang asawa.
Matod ni Eva Kristel Macua, asawa ni Maximino, nga mao kini ang labing unang higayon nga nangayo ni og hulagway kaniya.
Matag higayon nga duna silay operasyon, mananghid kini kaniya.
Dugang pa ni Eva Kristel nga niadtong tungora wa nipahibawo ang iyang bana nga dunay operasyon.
Ang magtiayong Macua dunay tulo ka anak, edad 6 ug 2 anyos nga kaluha.