GIPUSIL ug giluba ang duha ka managghigala kagahapon mga alas 12:00 sa kadlawon sa Barangay Cabantian, lungsod sa Manticao, Misamis Oriental.
Samad pinusilan sa agtang ang naangkon ni Jun Panunsi, 23, ulitawo, samtang samad dinunggaban sa tiyan ang naangkon ni Rey Balabat, 29, minyo, pulos mga residente sa susamang lungsod.
Gitumbok nga suspetsado ang grupo sa Black Dragon Gang nga giingong notoryos nga grupo sa maong dapit.
Usa sa mga higala sa biktima nga nahinabi sa Sun.Star Superbalita nibutyag nga paingon na nga mouli sa tagsa tagsang mga puloy-anan dihang natabo sa mga biktima ang maong mga grupo.
Padayon sa paglakaw ang mga biktima dihang deretso nga giatangan ug gihanggat og sukmagay. Wala misukol ang mga biktima apan kalit lang nga mikuha og kutsilyo ang usa ka sakop sa grupo ug deretsong giluba si Balabat.
Naigo ang tiyan niini hinungdan sa pagkaligid. Samtang misunod dayon ang usa ka buto gikan sa wala matinong armas ug miigo ang bala ngadto sa agtang ni Cabantian.
Pulos nagbuy-od ang maghigala nga namatikdan sa mga residente sa dapitmao nga daling gitabang.
Samtang dali sab dayon nga misibat ang mga suspetsado.
Matud sa paryente nga nakapaalarma pag-ayo ang maong grupo labina nga manghilabot bisan wala gihilabtan sa mga batan-on.
Hinuon kini nga kaso giatiman na sa kapolisan sa Manticao Police Station aron pagtumbok ug pag-ila sa mga sakop sa maong grupo.
Sa pagsulat ning balita, gidala sa Northern Mindanao Medical Center (NMMC) ning siyudad sa Cagayan de Oro ang mga biktima kinsa gipasalamatang luwas na sa makuyaw’ng kahimtang.