Super Suroy: Sirao: Kinaiyahang duol sa tugkaran

(Hulagway kuha ni Dwight Ligan)
(Hulagway kuha ni Dwight Ligan)

GIKAPOY ka ba sa pagpanikay-sikay sa siyudad? Ang kakapoy sa lawas gumikan sa way puas nga wadwad sa trabaho. Gusto ka bang mo-relax bisan sa makadiyot nga higayon aron pag-recharge sa imong energy?

Syempre kinsa may dili ganahan ana diba, molaag palayo sa sistema?

Apan sa panahon karon, murag magpanagana na ang mga tawo sa paggasto ilabi nang mosuroy out of town tungod kay dili lang mahago sa biyahe, makabuslot pa sa bulsa.

Akong ikasugyot nga makahupay sa inyong stress mao ang Sirao Peak.

Sa wa pa mahibawo o makataak sa maong dapit nahimutang kini sa Barangay Pung-ol-Sibugay, dakbayan sa Sugbo. Ang maong bukid nagbuntaog sa gibana-bana nga 600 meters above sea level (MASL) ug sa maong gihabugon dili kini lisod taakon ilabi na niadtong beginners o mao pay pagkatkat sa bukid.

Mga agi-anan nga kapilian

Ang Sirao Peak daghang agi-anan ang labing naandan nga agian sa mga tawo mao ang Trail via Budlaan ug ang backdoor entry.

Ang Trail via Budlaan gibana-bana nga molanat og duha ngadto sa lima ka oras nga baktas depende sa inyong ka paspason.

Ako nakasiguro nga dili mo bation og kakapoy kay samtang kamo nagbaktas mosugat sa inyong panan-aw ang katahom sa kinaiyahan sa maong lugar.

Kon wa mag-uwan mamahimo sab nga mosubay sa Budlaan Falls, nahimong inila ang maong falls sa dihang nag-viral kini niadtong tuig 2015 gumikan sa iyang porma nga gitawag og “heart-shaped basin”.

Apan sa higayon nga mo-uwan advise lang nako nga mosubay sa agi-anan nga layo sa sapa.

Sigun pa sa akong nadunggan sa pagtaak sa maong dapit nga si Kuya Val, mas maayong molikay sa sapa ilabi na nga nag-uwan kay dako ang posibilidad nga kalit mosaka ang tubig dunganan sa kusog ang sulog nga moresulta unya sa disgrasya.

Sa Budlaan trail sab ninyo malabyan ang Kan-irag Nature Park diin inyong matagamtaman ang susama sa “European Country Side” feels tungod sa katahom sa landscape niini.

Pipila sab ka local flower farms ang imong ma-agian lakip na ang bukid sa Mount Kan-irag diin ideal alang niadtong buot mag-camping.

Ang campsite sa Mt. Kan-irag adunay tindahan ug pansayan.

Sa kadtong wa makadala og gamit sa pagluto pwede ra moadto sa campo.

Ang Backdoor entry nga agianan molanat og 20 ngadto sa 30 minutos nga paglakaw. Kon ganahan mong mo chill kini ang pilia ninyo nga agianan.

Unsaon pag-adto?

Sa Backdoor entry, kon manukad sa JY Square pag-hire og habal-habal nga mosugot nga mohatod nimo sa Ayala Heights Police Station sa pletehan nga moabot sa P75 - P100 matag tawo. Pag-abot sa naasoyng dapit kilid sa kalsada ang jumpoff point niini nga agi-anan.

Sa Budlaan trail, gikan sa Ayala Center Cebu sakay og PUJ sa rota nga 13C ug kanaog paghi-abot sa Gaisano Grand Mall sa Barangay Talamban.

Sakay og habal-habal og pahatod sa Sitio Baugo ug ipahibawo sa drayber nga paingon ka sa Sirao Peak, sa mga drayber nga suheto ihunong ra mo sa starting point sa inyong pagbaktas sa pletehan nga P25 matag pasahero.

Angayang masayran

Akong tambag sa mga interesado nga mas bintaha kon daghan o grupo mo sa iyang pagpa-ingon sa Budlaan alang sa kasiguroan sa inyong seguridad ug makadaginot sa inyong gastuhan kay adunay kay katunga.

Mamahimo sab nga mo-hire og guide nga mokabat sa P500 ngadto sa P700 ang rate.

Isil-sil sa imong alimpatakan ang pagtahod sa mga local o residente sa maong dapit ug dili magpatakag labay sa inyong mga basura.

Ang Sirao Peak maoy akong paborito nga “go-to place” kon gikinahanglan kong mopahuway sa stress ug pressure sa trabaho ilabi na nga duol ra sa urban area sa Cebu City.

Sa inyong pagtaak gawas sa kanindot nga talan-awon gikan sa ibabaw nga bahin tagbawa ang imong kaugalingon sa panoramic view sa city lights.

Ang presko ug bugnaw sa hangin nga layo sa polusyon ang imong mahanggap.

Ang maong kasinatian siguradong dili mahanaw sa inyong panumdoman.

Tana! Suroyon ta ang Sirao.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph