KANIADTO, sa dihang kanunay natong hisgutan ang dili maayong relasyon sa kadagkuan sa Cebu City hall ingnon dayon ta nga nangintriga. Apan karon dili lamang ang mayor ug bise mayor maoy gituhoang wa magkasinabtanay kon dili apil na ang ubang mga tawo nga sakop sa administrasyon sa siyudad. Anaay konsehal ug kanhi konsehal nga gipaluyohan sa kanhi barangay kapitan, ang nagkabangga. Daghan usab ang nangreklamo sa kahawod sa usa ka adviser sa mayor. Basta nagkalandrakas na lagi kuno ang sitwasyon diha sa Cebu City hall. Ang buot nilang ipasabut nga walay control si Mayor Edgardo Labella sa iyang mga tawo. Daghang magmayor-mayor. Murag gipahimuslan nila ang kaayo sa mayor.
Panahon na nga gamiton ni Mayor Labella ang iyang gahum aron disiplinahon ang iyang mga subordinates. Dili maayo nga magpadayon kining sitwasyon karon diha sa balay-lungsod. Magtuo ang katawhan nga huyang siya nga pagka-tawo nga dili angayang padad-on sa renda sa pangagamhanan sa usa ka dakung siyudad sama sa Cebu City. Daku pa ang panahun nga usbon sa mayor ang iyang leadership style. Kana kon gusto siyang molampus sa iyang mga tinguha sa pagka-lider sa usa sa mga nag-unang siyudad sa nasud.
•••
Kining lunop ug baha maoy kanunay natong problema kon adunay kusog nga uwan. Tungod kini sa pagpatakag labay sa basura sa mga tawong badlungon. Nabuni ug nihiktin na ang ubang mga kanal tungod sa kabalayan nga gitukod sa maong mga dapit. Upaw na usab ang atong kabukiran kay gihimo na og mga high-end subdivision diin sementado na ang kayuta-an nga dili na makatuhop ang tubig-uwan.
Kinahanglang estriktuhon na ang pagpatuman niining mga water catchment sa mga building. Kinahanglan usab nga himu-an og mga water catchment system ang atong kabukiran aron maoy mopundo sa uwan inay nga modulhog kini sa kadalanan. Atong hangyu-on ang atong mga kongresista ug mga senador nga pangita-an og pundo aron ma-implimentar ang drainage master plan dili lamang sa Cebu City apan sa tibuok Metro Cebu. Kinahanglang mag-apil kini sa paagi sa pagpaguwa sa baha ngadto sa kadagatan panahun sa ta-ub.
•••
Ang simbahang katoliko mi-ila sa tulo ka nagkalainlaing mga Santos nga ginganlan og Valentine o Valentinus, nga pulos gipamatay. Dihay mga pagtuo nga si Valentine usa ka pari nga nagsilbi sa ikatulong siglo sa Roma. Sa dihang si Emperor Claudius II mihukom nga ang mga ulitawo mas maayong mga sundawo kon itandi sa mga adunay asawa ug pamilya, iyang gidid-an ang pagminyo sa mga batan-on. Si Valentine wala motuman sa kasugoan sa emperor ug iyang gipadayon ang pagkasal sa mga batan-ong managhigugma. Sa dihang nasayran ni Claudius ang iyang gihimo gipapatay siya. Ang uban hinuon mi-insister nga si St. Valentine of Terni nga usa ka obispo maoy gipasadunggan niining Valentine’s day. Gipapatay usab siya ni Claudius II. Karon atong gisaulog ang adlaw sa managhigugma-ay. Happy Valentine’s day sa tanan! (mannyrabacal1144@gmail.com)