BISAN pa sa pagkuyanap sa corona virus disease (Covid-19)nga nikalas na og kapin sa usa ka libo ka mga kiabuhi, kadaghanan didto sa mainland China, nagpabilin gihapon ang sense of humor sa mga Pilipino. Magsaulog gihapon sa Valentine’s Day karong adlawa.
Apan masulub-on ang akong higala kay niingon siya nga duna siya’y nCoV sa Valentine’s Day bisan kon wa siya makataak sa Wuhan, China ug wa siya makaduol ni bisan kinsa nga natakboyan sa maong balatian.
Di kini tiaw kay kadtong suspetsado nga dunay nCoV ikorintinas og labing menos 14 ka adlaw subay sa lagda sa World Health Organization ug sa Department of Health. Sus ang kahulugan diay sa iyang nCoV – no cash on Valentine’s Day.
•••
Ang WHO adunay giproponer nga opisyal nga ngan sa 2019-nCoV. Mao kini ang Covid-19. Ang buot ipasabot sa maong acronym mao ang coronavirus disease 2019, sanglit una kining na-detect sa naghinapos na ang tuig 2019.
Si Tedros Adhanom Ghebreyesus, director general sa WHO, niingon nga ang bag-ong ngan wa maghisgot sa mga tawo, lugar ug mga mananap nga may kalabotan sa bag-ong coronavirus aron paglikay sa stigma o buling sa ngan.
Karon nga duna nay klarong ngan ang bag-ong corona virus, mas maayong pangitaan sab og tambal ang maong balatian samtang wa pa ni mograbe dinhi sa atong nasod.
•••
Valentine’s Day man karon, maminaw ta ani. Usa ka pari misulti ngadto sa iyang mga parokyano, “Kining puti nga kandila maoy dagkutan sa mga dalaga ug ulitawo arun makakita og gugma. Pula alang sa mga minyo arun molungtad ang gugma. ”
Nipadayon ang pari, “Blue para sa mga nagkabuwag arun makakita og bag-ong gugma.” Nangutana ang dalagang guwang sa pari, “Kami padre unsa may among dagkutan? Tubag sa pari, “Pagdagkot lang mog katol arun di mo lamukon og hinuwat sa gugma”
Kon magminyo, likayan lang ang gubot. Sama sa tawong naminyo sa usa ka byuda nga dunay anak nga dalaga. Ang iyang amahan nangasawa sab sa anak sa iyang asawa. Ang nahitabo, ang iyang amahan nahimo na niyang step-son, ang iyang step-daughter nahimo niyang step-mother. Ang iyang asawa ugangan sa iyang amahan. Kon manganak ang iyang amahan ug ang anak sa byuda, kamo na lay kuwenta.