DILI kapugngan ang kadasig sa mga atleta ubos sa Private Schools Athletic Association (Prisaa) nga mosugod sa ilang paugnat sa kusog karon, Pebrero 15, didto sa University of Mindanao sa Maa, dakbayan sa Davao.
Gibutyag ni Ma. Lita Montalban, presidente sa Prisaa, didto sa Davao Sportswriters Association forum Huwebes sa SM City Davao The Annex nga mopadayon ang dula sa mga estudyante sa kolehiyo luyo sa hulga sa Coronavirus sa ubang mga dapit sa nasud.
Ang uban nga mga dula nga mabilin ipadayon matag Sabado ug Dominggo sa mosunod nga mga semana hangtud mahuman.
Suma pa, way angay nga kabalak-an kay mga taga-dakbayan sa Davao ra ang mga atleta gikan sa 18 ka tunghaan sa kolehiyo nga sakop sa Prisaa.
Ang modaug sa 24 ka isports sa Davao City level morepresenta sa dakbayan sa Davao sa mosunod nga Regional Prisaa meet sa Marso 14-16 sunod nga bulan isip pangandam alang sa umaabot nga National Prisaa meet nga himuon didto sa Tuguegarao City sa Luzon sa bulan sa Abril, matud ni Montalban.
Buot ni Montalban nga ang tanan nga mokampeyon sa 24 ka isports dalahon unta sa Prisaa National Meet apang tungod sa kalayo, basin dunay pagpili nga matigayon kon unsa lang nga mga team ang madala.
Posible sab nga sa mga sakop sa team dunay mabilin tungod sa kakulang sa pundo dugang pamahayag ni Montalban.
Suma pa dunay mga doktor ug nars nga moatiman sa matag kahimtang sa panglawas sa mga estudyante.