DAVAO DE ORO -- Nagkutoy ang mga tiyan, way makaon human naundang ang panginabuhian, mga molupyo nitiyabaw sa kagutom dihang gipatuman sa Provincial Task Force Naboc River (PTFNR) ang pagpasirado sa mga bolmilan bitbit ang cease and desist order gikan sa Mines and Geosciences Bureau (MGB) didto sa Purok 1-A, Barangay Mt. Diwata, lungsod sa Monkayo.
Luyo sa pagbundak sa makusog nga ulan, padayon ang gihimong panaghiusa sa katawhan adlaw'ng Huwebes, Pebrero 13, 2020, ug nanawagan ngadto sa administrasyong Duterte nga sila tabangan ug tugtan nga mabalik ang mga bolmilan human nga gipangpadlakan ug gisirhan niadtong Lunes, Pebrero 10, 2020.
Ang biyuda nga si Rose Matilac, 50, naghilak nga nagsugilon nga wa na siyay ipalit og bugas human nga gipadlakan ang iyang bolmilan nga maoy iyang panginabuhian.
Dakong problema sa biyuda ang upat niya ka mga anak nga gipa-eskuwela sanglit wa na siyay ikabayad sa ilang matrikula ug wa nay kuwarta nga mahatag nga allowance.
Mga minero nga gikinahanglan ang mga bolmilan sa makuhang mga bulawan naundang usab ang trabaho.
Ang Imam sa relihiyong Islam nga si Amer Hasan Dimangkay nga nanginabuhi sa dapit pinaagi sa pagpamaligya og nagkalain-laing mga gamit nagkaproblema sa negusyo gumikan kay wa nay tarong halin. Ang mga utang sa iyang mga suki wa na mabayri human nga ang nag-unang panginabuhian sa barangay gipaundang.
Gibutyag nga aron mapanalipdan ang kinaiyahan partikular ang Naboc River, gimandoan ang mga nanag-iya og planta ug mga bolmilan nga ibalhin ang ilang operasyon ngadto sa Sitio Mibatas, Barangay Upper Ulip apan ang mga tag-iya og bolmilan ug mga apektadong indibiduwal wa mituman sa mando sanglit sumala pa halayo ang maong dapit nga balhinan ug dakong gasto ang himuong proseso sa pagbalhin.
Wa usab mituman ang mga minero sa sugyot sanglit sumala pa wa nay mabilin sa makuha nilang bulawan kung atua sa gisugyot nga dapit ang mga bolmilan.
Gikabalak-an usab sa pipila ka mga nanag-iya og bolmilan ang gisugyot nga lugar nga pagabalhinan sanglit giingon nga gipanag-iyahan kini sa mga lumad ug di mosugot ang tribu nga didto ibalhin ang mga bolmilan ug planta.
Gisulti ni Khernie Bahan nga usa sab sa mga nanag-iya og bolmilan nga wa siyay supak sa giingong kabag-ohan nga ipatuman sa gobyerno apan hangyo niya nga di lang unta sila dali-dalion, inay tagaan og igong panahon aron iplastar ang tanan ug dili kay diretso padlakan ang ilang panginabuhian. Unsa naman kuno ang ilang kaunon?
Giingon nga adunay food assistance nga ipadala alang sa mga naapektuhang mga molupyo apan ang mismong kagawad sa barangay nga si Trisilyn Lasaga nagsulti nga dili kini makasustiner alang sa katawhan sa lugar.
Dugang pa nga kung di dunggon sa gobyerno ang mga mulo ug hangyo, mapugos ang katawhan pagguba o pagtanggal sa mga kandadong nakapadlak sa mga bolmilan aron adunay makaon ang tagsa-tagsa nila ka mga pamilya.
Sa pagsuwat ning balita, gipaningkamutan nga makuha ang habig sa kasamtangang gobernador sa probinsiya, Jayvee Tyron Uy, ug mapaabot kaniya ang mga mulo ug hangyo sa nagkahiusang katawhang giingong nag-antus sa kawad-on ug kagutom. (Dexter T. Visitacion)