MOGAMIT ang SM City Cebu management og thermal scanning device sa pagpahigayon sa SM2SM Run Year 10 ugma sa alas 3:30 sa kadlawon sa SM City parking area sa North Reclamation Area, Cebu City.
Ang mga nagpasiugda gustong makaseguro nga himsog ang tanang mga partisipante ug luwas sa hulga sa coronavirus disease (Covid-19) hinungdan nga nagkinahanglan silang mogamit og thermal scanning.
Kapin sa 6,000 ka runners ang mosalmot ning maong lumba.
“We will not allow (the runners with fever). There will be a medical team on standby,” matod ni RJ Leduna, SM senior public relations manager, sa SunStar Cebu, igsuong buhatan ning mantalaan.
Gawas sa paggamit og thermal scanning, ang mga nagpasiugda manghatag sab og gagmayng alcohol bottles aron magamit sa paghinlo sa matag kamot sa mga partisipante.
Ang mga kategoriya nga naglangkob sa lumba mao ang 21-kilometer, 12K, 8K ug 4K.
Nagkanayon si race director Joel Baring sa Sports and Fitness Enthusiasts nga pipila sa dekalidad nga runners sa nasod ang makasalmot sa lumba sama na lang ni Southeast Asian Games (SEA) gold medalist ug Milo Marathon queen Christine Hallasgo.
Mosalmot sab sa lumba ang beteranong runner nga si Christabel Martes ug hasta si kanhi Milo champion Jason Agravante.
Mokabat ngadto sa P600,000 ang kinatibuk-ang ganti sa lumba.
Adunay ipang-raffle nga bag-ong Chevrolet car, gift certificates gikan sa hotels ug uban pang majorsponsors, airline tickets gikan sa Cathay Pacific ug RealMe phones. (RSC, ESL)