Nadela: Oratio Imperata sa Covid-19

SA NAKALABAY nga semana nakadawat ko og mensahe pinaagi sa viber ni Leo Lastimosa usa sa mga tinamod nga komentarista sa dyAB ug maglilindog.

Ang mensahe naghisgut sa coronavirus kun Convid-19. Ang iya diayng binisaya nga version sa Oratio Imperata nga gipagawas sa Simbahang Katoliko labot sa virus nga nikalas na og subra sa usa ka libo ka kinabuhi.

Gusto ni Leo nga ako ang mo-voice over sa Bisaya version. Tuod man pinaagi sa tabang sa ABS CBN News Team nila ni Lelet Romaguera ug Robert Abanes na-record nako ang Oratio Imperata sa tumang kasayun nianang pagka Domingo. Sugod niadtong Lunes Pebrero 10, ang Bisaya version gisugdan og palanog sa kahanginan pinaagi sa sibyaanan nga dyAB sa ABS CBN. Makapanlibawot sa balahibo ang unod sa Oratio Imperata nga akong gibasa.

Ang mga pangaliya sa kahitas-an pagpakgang ning maong virus dulot sa unod. Ang pagsampit sa mga Santos ug Birhen Maria nga makaplagan sa mga doktor ug gobyerno ang tambal aron mapugngan ang pagkuyanap sa maong sakit, nasukip sa maong pag-ampo. Nangaliyupo ug nangilaba nga sa katapusan mahunong na ang kahadlok nga maoy naghari karong panahona. Sa mga linya nga akong gibasa wa mahisguti didto kining gihimo sa uban karon nga pagsabwag og fake news labot sa makamatay nga virus. Apan sa akong pagsubli gahapon sa script naay linya didto nga nagkanayon, “ ug sa pagbadlong sa nisulbong nga pagkatap.”

Sa akong pagsabot badlongon sa Ginoo ang nisulbong nga pagkatap sa virus. Pero mahimo sab ning hubaron nga pagbadlong sa mga tawo nga nagpataka lang og pakatap og mga sayop nga balita mahitungod sa Covid-19. Sama sa gihimo sa taga Talisay City kinsa nag-atubang karon og kasong kalapasan sa Article 154 sa Revised Penal Code in relation sa section 6 sa Cybercrime Law ug usurpation of public office.

Usa ka Jewel Louie Aviso maoy gipasanginlan nga nakalapas sa maong balaod tungod sa iyang pag post og fake news labot sa Covid-19. Gigamit pa gyud niya ang buhatan ni Alvin Santillana ang pangulo sa Talisay City Disaster Risk Reduction & Management Office. Sa interview sa Super Balita si Santillana niingon nga unta ang pagpasaka og kaso batok kang Aviso magsilbi nga leksyon di lang sa panglawas nga isyu nga mao ang Covid-19, apil na ang ubang isyu nga fake unya i-post sa social media. Balik sa Oratio Imperata nga gisangyaw karon sa mga simbahan nindot kong kamo maka kuha og kopya aron maapil sa inyong.mga pag-ampo sa inypng tagsa tagsa ka panimalay. Bisan diha sa mga kapilya. Ang ubang relihiyon nagtoo ko nga duna say ilang kaugalingon nga pag-ampo nga gihimo. Way makatupong sa gahom sa Diyos pagsanta ning maong virus.

Ang atong mga pag-ampo gikinahanglan kaayo karong panahona.

Related Stories

No stories found.
SunStar Publishing Inc.
www.sunstar.com.ph