Albor: Habal-habal ug angkas

UNANG nauso ang Habal-habal sa hilit nga dapit sa Mindanao. Nahasulod sa Sugbo sa dekada 90. Gitawag sa Camotes og motor service apan kon iluwan kargamento nganlan og skylab. Motadlas sa kabukiran kay walay motaak nga pasaheroan ug apiki ang kadalanan. Sa dakbayan mga drayber sa Habal-habal nagpasakop sa Angkas nga susama sa Grab nga mogamit sa aplikasyon sa Smart phones. Nasikat sa Bangkok, Brazil, China ug Cambodia kay pinakabarato ug paspas. Gitugot ni Mayor Tomas Osmeña bisan ilegal taliwala sa nagkagrabi nga suliran sa trapiko. Dis. 12, 2018 gipahunong sa Supreme Court ang Habal-habal ug Angkas subay sa Land Transportation and Traffic Code (RA 4136) nga nagdili nga himoong pasaheroan ang motorsiklo. Si Osmeña nga nagpundok sa Angkas miapilar aron makapadayon sa kapanginabuhian sanglit tipik na sa ekonomiya. Tagsa ka sakong bugas sa mga drayber nga naapektohan sa hukom. House Bill (HB) 6046 ni Anad Rep. Jun Alcover nga mag-legal sa Habal-habal wala matagai og prayoridad sa kongreso. Magpapas sa RA 4136 kay dili na haom karon gumikan sa grabing trapik sa siyudad ingon man sa kabukiran nga hagip-ot ang kadalanan. Adbokasiya ni Alcover nga kanhi usab konsehal pagtabang sa mga drayber alang sa kahiusahan paghatag og maayong ugma. Ginuntan ni Mayor Edgar Labella pinaagi sa EO 36 gimontar ang Cebu City Motor Riders Community Welfare Office sa katuyoan nga tukoron ang kooperatiba aron mapalambo ang kinitaan. Gisakyan sa HB 8959 ni Rep. Raul del Mar nga karon nag-ong-ong sa kongreso. Tawgon na unya og motorcycle taxi.

Technical Working Group (TWG) sa DOTR, LTFRB, LTO ug Inter-Agency Council for Traffic (IACT) nag-eksperimento gikan sa Hunyo 2019 nga gilugwayan hangtod Marso 2020. TWG Chairman Antonio Gardiola mipasangil sa Angkas nga 90 porsento gipanag-iya sa Singaporean Corporation nga nakalapas sa 60-40 sa balaod sa pagpanag-iya, mipaburot sa pletihan, wala taronga pagtaod ang vest ug helmet ingon man nag-operate sa Cagayan de Oro ug General Santos nga ang gisitar nga pilot area mao raman ang Metro Manila ug Metro Cebu. Kulang sa kasinatian ang mga sakop sa TWG sa pagdumala sa eksperimento hinungdan nga gilabhan sa senado. Gawas sa Angkas intresado ang CityMuber, JoyRide, MoveIt, EsetGo, Sakay ug VroomGo. Gitabangan pagduso ni Sen. Koko Pimentel ang JoyRide ug MoveIt ngadto sa DOTR. Ang GrabBike nga hinog nag teknolohiya nga nagmonopoliya sa Grab Car desidido sab. Sa siyudad sa Sugbo dunay 15,000 ka Habal-habal drivers ug 30,000 ang Angkas. (csa_1156@yahoo.com/09064648954)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph