KITA tanang mga mamumuo o nanrabaho dunay mga labaw nga gisunod - boss, supervisor o manager.
Niadtong dugay na sa gitrabahoan duna koy mga nadungog nga mga nang reklamo sa kakapoy ug ka puol kay wa may katagbawan. Wa may trabaho nga di kapoy, di ba? Huna-hunaa baya nga kining atong inadlaw-adlaw nga kapaninguhaan dako nga grasya gikan sa kahitas-an kay kini maoy nagtabang nato pagbutang og pagkaon sa lamisa, pagtukod og balay-kapasilunganan, palit og bistada, bayad sa suga, tubig, abangan ug eskwelahan aron makomportabli ang pagkabutang.
Sahi pa dunay uban nga gusto kaayong manrabaho apan way swerti kay hangtod karon nagsegi gihapon og pangita og kasudlan.
Ang akong lindog karong adlawa mahitungod og ‘Work Ethics’. Unsa may mga hiyas sa mga mamumuo nga gipangita sa mga amo?
Sa akong pagka-Human Resource Management Officer ug Personnel Officer kaniadto, kining mosunod nga golden rule para sa mga mamumuo maoy gipangita sa mga tag-iya, amo o tigduma:
Una kadtong mga empleyado nga kugihan manrabaho bisag way nagtan-aw o maningkamot nga makakita og mga maayong paagi aron maka-daginot ug makab-ot ang gitinguha nga makapa-ayo ug makapalambo sa kompaniya di lang magmantiner o ma kontento sa unsay naa.
Ganahan sab ang mga amo sa mga empleyado nga andam ug tagana molihok ug maminaw sa mga pahimangno ug di niadtong mga borokinto ug hinawayon nga kanunay bati o negatibo ang makita unya kanunay pang mangunay og panaway.
Kini nga klase sa mga mamumuo mga gahi’g ulo ug way katagbawan kay para nila sila ray insakto maong bisag unsaon pa og tudlo kini sila magbuot ug magtuman sa ilang kaugalingong prinsipyo ug paagi. Ang ending ini pagkataktak sa trabahoan.
Katapusan kining pagka hangol og atensiyon. Kining klasiha sa mamumuo uhaw sa pagdayeg, promotion o ‘kulang sa pansin’. Angay hinumduman nga ang dayeg, ganti, awards o recognition dili pinugos ug pinangayo kundi boluntaryo kining ipanghatag niadtong angayan nga makadawat.