PULIS nag-negosyo og illegal nga pa-refillan og gasolina sa iyang balay sa Barangay Pagsabungan, dakbayan sa Mandaue, gireklamo sa silingan niadtong Huwebes, Pebrero 13.
Ang pulis na-assign sa Opao Police Station ug karon anaa na sa Regional Training Center. Gipugngan ang ngalan sa pulis kay wa makuhai sa iyang habig.
Sigon ni PCpl. Glenn Bordalba, ang imbestigador sa kaso, adunay nireklamo sa ilang estasyon kabahin sa maong negosyo.
Pag-check sa kapulisan sa Basak Police Station, ilang nakita nga 25 ka plastic gallons nga gasolina anaa gibutang sa gawas sa iyang balay.
Gireklamo ang pulis tungod nasuko kini sa ilang silingan nga nagdaob ug nagpahibawo kini nga adunay mga gasolina sa gawas sa iyang panimalay.
Sigon ni Bordalba nga dako kining hulga dili lang alang sa pulis apan sa iyang mga kasilinganan tungod ang maong mga gasolina mamahimong musilaob kung kini mapaduol sa manigarilyo o magdaob labi na nga wala kini taboni.
Mamahimo kining muresulta og sunog sa maong lugar.
Dugang ni Bordalba nga gituohan nga ang supply sa iyang mga gasolina gikan sa mga container van nga “magpaihi.”
Sagad ani nila, sigon ni Bordalba, nga ang kining mga container van magpagasolina ug ang mubayad ang ilang kompanya. (KFD)